umr-e-rafta main tere hath bhi kya aaya hun

umr-e-rafta maiñ tire haath bhī kyā aayā huuñ

din bitāne the magar ḳhud ko bitā aayā huuñ

dhuul bhī aise qarīne se uḌaa.ī hai ki maiñ

ek marte hue raste ko bachā aayā huuñ

kal ko de ā.ūñgā jā kar use bīnā.ī bhī

aañkh dīvār pe filhāl banā aayā huuñ

vādī-e-saut nahīñ mujh ko bhulāne vaalī

naqsh yuuñ kar ke vahāñ apnī sadā aayā huuñ

sirf paañv hī nahīñ qaid se bāhar aa.e

apnī zanjīr ko bhī kar ke rihā aayā huuñ

apne aañsū bhī kiye nazr kisī paanī ke

pyaas dariyā kī bahar-taur bujhā aayā huuñ

zindagī tū bhī bahut yaad karegī mujh ko

tere hisse ke bhī dukh-dard uThā aayā huuñ

ab pareshāñ huuñ ki tābīr kā jaane kyā ho

band kānoñ ko nayā ḳhvāb sunā aayā huuñ

jaane kis ghaaT lage umr kī kashtī 'ahmad'

ḳhud ko sūkhe hue dariyā meñ bahā aayā huuñ

umr-e-rafta main tere hath bhi kya aaya hun

din bitane the magar KHud ko bita aaya hun

dhul bhi aise qarine se uDai hai ki main

ek marte hue raste ko bacha aaya hun

kal ko de aaunga ja kar use binai bhi

aankh diwar pe filhaal bana aaya hun

wadi-e-saut nahin mujh ko bhulane wali

naqsh yun kar ke wahan apni sada aaya hun

sirf panw hi nahin qaid se bahar aae

apni zanjir ko bhi kar ke riha aaya hun

apne aansu bhi kiye nazr kisi pani ke

pyas dariya ki bahar-taur bujha aaya hun

zindagi tu bhi bahut yaad karegi mujh ko

tere hisse ke bhi dukh-dard uTha aaya hun

ab pareshan hun ki tabir ka jaane kya ho

band kanon ko naya KHwab suna aaya hun

jaane kis ghaT lage umr ki kashti 'ahmad'

KHud ko sukhe hue dariya mein baha aaya hun