umr sari teri chahat mein bitani paD jae

umr saarī tirī chāhat meñ bitānī paḌ jaa.e

ye bhī mumkin hai ki ye aag bujhānī paḌ jaa.e

merī is ḳhāna-badoshī kā sabab pūchhte ho

apnī dīvār agar tum ko girānī paḌ jaa.e

mere a.adā se kaho had se tajāvuz na kareñ

ye na ho mujh ko bhī shamshīr uThānī paḌ jaa.e

kyā tamāshā ho agar vaqt ke sultān ko bhī

dar-e-insāf kī zanjīr hilānī paḌ jaa.e

kaash phir mujh se vo pūchheñ mirī vahshat kā sabab

kaash phir mujh ko vo tasvīr dikhānī paḌ jaa.e

dasht se shahr meñ kuchh soch ke aanā 'āsif'

zindagī bhar kī riyāzat pe na paanī paḌ jaa.e

umr sari teri chahat mein bitani paD jae

ye bhi mumkin hai ki ye aag bujhani paD jae

meri is KHana-badoshi ka sabab puchhte ho

apni diwar agar tum ko girani paD jae

mere aada se kaho had se tajawuz na karen

ye na ho mujh ko bhi shamshir uThani paD jae

kya tamasha ho agar waqt ke sultan ko bhi

dar-e-insaf ki zanjir hilani paD jae

kash phir mujh se wo puchhen meri wahshat ka sabab

kash phir mujh ko wo taswir dikhani paD jae

dasht se shahr mein kuchh soch ke aana 'asif'

zindagi bhar ki riyazat pe na pani paD jae