un dinon humne KHayalon pe tasarruf kiya tha

un dinoñ ham ne ḳhayāloñ pe tasarruf kiyā thā

shā.erī tark nahīñ kī thī tavaqquf kiyā thā

jaane kyā thā vo ta.alluq ki judā hote hue

ham bhī pachhtā.e the us ne bhī ta.assuf kiyā thā

kaisī hasrat se hameñ dekh rahā thā vo ġham

pesh jab ham ne use dil kā ta.āruf kiyā thā

raat yādoñ ne ka.ī pahr masāfat ke baġhair

manzil-e-chashm sajāne kā takalluf kiyā thā

ishq ik umr salīqe se chhupāyā thā 'nafīs'

ya.anī ik umr talak kār-e-tasavvuf kiyā thā

un dinon hum ne KHayalon pe tasarruf kiya tha

shaeri tark nahin ki thi tawaqquf kiya tha

jaane kya tha wo talluq ki juda hote hue

hum bhi pachhtae the us ne bhi tassuf kiya tha

kaisi hasrat se hamein dekh raha tha wo gham

pesh jab hum ne use dil ka taaruf kiya tha

raat yaadon ne kai pahr masafat ke baghair

manzil-e-chashm sajaane ka takalluf kiya tha

ishq ek umr saliqe se chhupaya tha 'nafis'

yani ek umr talak kar-e-tasawwuf kiya tha