un ka raha mizaj jo barham tamam raat

un kā rahā mizāj jo barham tamām raat

kuchh arz-e-hāl kar na sake ham tamām raat

dikhlā.e husn-o-ishq ne aalam tamām raat

mahtāb vo chakor rahe ham tamām raat

aatā hai yaar sub.h ko jaatā hai shaam ko

din-bhar hai ghar bahisht jahannum tamām raat

ai chashm kar na din ko to ifshā-e-rāz-e-ishq

rone ke vāste nahīñ kuchh kam tamām raat

allah re ishtiyāq ki sotā rahā vo maah

haale kī tarah gird phire ham tamām raat

insāñ huuñ kyoñ na ro.uuñ jo poshīda ho vo ruḳh

be-āftāb rotī hai shabnam tamām raat

kyā kyā na ham ne kiiñ shab-e-vasl us kī minnateñ

sar yaar ke qadam pe rahā ḳham tamām raat

zindāñ kā haal pūchhte ho qaidiyoñ se kyā

din-bhar to dhuup paḌtī hai shabnam tamām raat

mar mar gayā maiñ bazm-e-tarab meñ baġhair yaar

mutrib kī taal mujh ko huī sam tamām raat

tum vaqt-e-shām ghar talak aa kar jo phir ga.e

ulTā marīz-e-ġham kā chalā dam tamām raat

huuñ vo marīz-e-ishq ki karte haiñ mujh pe dam

paḌh kar masīh sūra-e-mariyam tamām raat

auroñ ko aish ham ko ġham-e-hijr ai falak

sote hī ḳhalq jāgte haiñ ham tamām raat

teġh-e-nigāh-e-yār se Dartī hai fauj kam

kaisī safeñ haiñ barham-o-darham tamām raat

parvāne us taraf to idhar jal rahī hai sham.a

ye turfa iḳhtilāt hai bāham tamām raat

kī shaam ham ne sūrat-e-bismil taḌap ke sub.h

dard-e-jigar zarā na huā kam tamām raat

jab se bahisht-e-kūcha-e-jānāñ se haiñ judā

girte haiñ uTh ke ham qad-e-ādam tamām raat

kis kā ḳhayāl hai ye ilāhī ki misl-e-chashm

rahtā hai ghar meñ nuur kā aalam tamām raat

ghar hijr meñ jo ta.aziya-ḳhāne se kam nahīñ

paḌh paḌh ke nauha karte haiñ mātam tamām raat

us gul-badan ke ishq meñ ro.uuñ na kyoñ 'asīr'

hai mujh ko rashk-e-tāle.a-e-shabnam tamām raat

un ka raha mizaj jo barham tamam raat

kuchh arz-e-haal kar na sake hum tamam raat

dikhlae husn-o-ishq ne aalam tamam raat

mahtab wo chakor rahe hum tamam raat

aata hai yar subh ko jata hai sham ko

din-bhar hai ghar bahisht jahannum tamam raat

ai chashm kar na din ko to ifsha-e-raaz-e-ishq

rone ke waste nahin kuchh kam tamam raat

allah re ishtiyaq ki sota raha wo mah

haale ki tarah gird phire hum tamam raat

insan hun kyon na roun jo poshida ho wo ruKH

be-aftab roti hai shabnam tamam raat

kya kya na hum ne kin shab-e-wasl us ki minnaten

sar yar ke qadam pe raha KHam tamam raat

zindan ka haal puchhte ho qaidiyon se kya

din-bhar to dhup paDti hai shabnam tamam raat

mar mar gaya main bazm-e-tarab mein baghair yar

mutrib ki tal mujh ko hui sam tamam raat

tum waqt-e-sham ghar talak aa kar jo phir gae

ulTa mariz-e-gham ka chala dam tamam raat

hun wo mariz-e-ishq ki karte hain mujh pe dam

paDh kar masih sura-e-mariyam tamam raat

auron ko aish hum ko gham-e-hijr ai falak

sote hi KHalq jagte hain hum tamam raat

tegh-e-nigah-e-yar se Darti hai fauj kam

kaisi safen hain barham-o-darham tamam raat

parwane us taraf to idhar jal rahi hai shama

ye turfa iKHtilat hai baham tamam raat

ki sham hum ne surat-e-bismil taDap ke subh

dard-e-jigar zara na hua kam tamam raat

jab se bahisht-e-kucha-e-jaanan se hain juda

girte hain uTh ke hum qad-e-adam tamam raat

kis ka KHayal hai ye ilahi ki misl-e-chashm

rahta hai ghar mein nur ka aalam tamam raat

ghar hijr mein jo taziya-KHane se kam nahin

paDh paDh ke nauha karte hain matam tamam raat

us gul-badan ke ishq mein roun na kyon 'asir'

hai mujh ko rashk-e-talea-e-shabnam tamam raat