un ke baghair kaise bhala shab basar karen

un ke baġhair kaise bhalā shab basar kareñ

ḳhvāboñ meñ aa.eñ vo ki zarā shab basar kareñ

parda uThā hijāb uThā koī baat kar

so.e hue badan ko jagā shab basar kareñ

tū niiñd hai charāġh hai tū dil kā chain hai

tere baġhair kaise bhalā shab basar kareñ

chup-chāp ek dūsre ko dekhte haiñ ham

ai chāñd koī baat banā shab basar kareñ

kartī huuñ maiñ bhī jism jalāne kā faisla

tū bhī magar charāġh bujhā shab basar kareñ

jab zindagī azaab kī sūrat ho hijr meñ

is hālat-e-ḳharāb meñ kyā shab basar kareñ

'māhīn' kah rahā hai mirā yār-e-bevafā

dil ke diye kī lau ko baḌhā shab basar kareñ

ik umr ho ga.ī hai basar shab kiye hue

'māhīn' rūThā yaar manā shab basar kareñ

un ke baghair kaise bhala shab basar karen

KHwabon mein aaen wo ki zara shab basar karen

parda uTha hijab uTha koi baat kar

soe hue badan ko jaga shab basar karen

tu nind hai charagh hai tu dil ka chain hai

tere baghair kaise bhala shab basar karen

chup-chap ek dusre ko dekhte hain hum

ai chand koi baat bana shab basar karen

karti hun main bhi jism jalane ka faisla

tu bhi magar charagh bujha shab basar karen

jab zindagi azab ki surat ho hijr mein

is haalat-e-KHarab mein kya shab basar karen

'mahin' kah raha hai mera yar-e-bewafa

dil ke diye ki lau ko baDha shab basar karen

ek umr ho gai hai basar shab kiye hue

'mahin' ruTha yar mana shab basar karen