un ke dil par gham-e-pinhan ka asar kya hoga

un ke dil par ġham-e-pinhāñ kā asar kyā hogā

jo idhar haal huā hai vo udhar kyā hogā

sab ke sab jalva-e-āġhāz-e-sahar meñ gum haiñ

kis ko ma.alūm hai anjām-e-sahar kyā hogā

zarra zarra pe ho jab ḳhauf-e-ḳhizāñ kā pahra

phuul par fasl-e-bahārāñ kā asar kyā hogā

rāh-e-dushvār bhī ho jaa.e yakāyak āsāñ

vo agar saath hoñ ehsās-e-safar kyā hogā

tere andāz-e-nazar hī pe haiñ nazreñ sab kī

dekhnā hai tirā andāz-e-nazar kyā hogā

jāda-e-ġham ke ḳham-o-pech se Darne vaalo

tum se duniyā kā koī ma.arka sar kyā hogā

aib ko vo jo hunar kahte haiñ kahne de 'zamīr'

aib har haal meñ hai aib hunar kyā hogā

un ke dil par gham-e-pinhan ka asar kya hoga

jo idhar haal hua hai wo udhar kya hoga

sab ke sab jalwa-e-aghaz-e-sahar mein gum hain

kis ko malum hai anjam-e-sahar kya hoga

zarra zarra pe ho jab KHauf-e-KHizan ka pahra

phul par fasl-e-bahaaran ka asar kya hoga

rah-e-dushwar bhi ho jae yakayak aasan

wo agar sath hon ehsas-e-safar kya hoga

tere andaz-e-nazar hi pe hain nazren sab ki

dekhna hai tera andaz-e-nazar kya hoga

jada-e-gham ke KHam-o-pech se Darne walo

tum se duniya ka koi marka sar kya hoga

aib ko wo jo hunar kahte hain kahne de 'zamir'

aib har haal mein hai aib hunar kya hoga