un ke honTon pe kyon hansi kam hai

un ke hoñToñ pe kyoñ hañsī kam hai

kyā mirī aañkh meñ namī kam hai

mere mahbūb phir koī jalva

chashm-e-bīnā meñ raushnī kam hai

hasrat-e-dīd rah na jaa.e kahīñ

aa bhī jaao ki zindagī kam hai

kyā kisī ne naqāb sarkā dī

kyoñ sitāroñ meñ raushnī kam hai

naqsh-e-pā un kā chuum lete haiñ

kyā hamārī ye bandagī kam hai

jaane kaise bahār aa.ī hai

lāla-o-gul pe tāzgī kam hai

kyoñ maiñ barsāt kī duā māñgūñ

kyā mirī aañkh meñ namī kam hai

sham.a kī lau pe raqs karte haiñ

jin patangoñ kī zindagī kam hai

baat kyā hai ki dil kī betābi

kal bhī kam thī aur aaj bhī kam hai

mere ġham kā hai ye asar 'aḳhtar'

un ke hoñToñ pe bhī hañsī kam hai

un ke honTon pe kyon hansi kam hai

kya meri aankh mein nami kam hai

mere mahbub phir koi jalwa

chashm-e-bina mein raushni kam hai

hasrat-e-did rah na jae kahin

aa bhi jao ki zindagi kam hai

kya kisi ne naqab sarka di

kyon sitaron mein raushni kam hai

naqsh-e-pa un ka chum lete hain

kya hamari ye bandagi kam hai

jaane kaise bahaar aai hai

lala-o-gul pe tazgi kam hai

kyon main barsat ki dua mangun

kya meri aankh mein nami kam hai

shama ki lau pe raqs karte hain

jin patangon ki zindagi kam hai

baat kya hai ki dil ki betabi

kal bhi kam thi aur aaj bhi kam hai

mere gham ka hai ye asar 'aKHtar'

un ke honTon pe bhi hansi kam hai