un ke hote kaun dekhe dida-o-dil ka bigaD

un ke hote kaun dekhe dīda-o-dil kā bigāḌ

paḌ gayā donoñ meñ fart-e-rashk se kaisā bigāḌ

us kī mahfil kā muraqqa.a khīñch ai maanī magar

is muraqqe meñ zarā tū ġhair kā chehrā bigāḌ

tere jhukne se jhuke haiñ dil ke lene ko hasīñ

kam lagā kar daam ai zālim na tū saudā bigāḌ

duḳht-e-raz ko shakl terī dekh kar nafrat na ho

talḳhi-e-mai se are zāhid na muñh itnā bigāḌ

haañ vahī phir ka.aba ban jā.egā ai sheḳh-e-haram

but-kade kā pahle naqsha khīñch phir naqsha bigāḌ

ho ta.alluq gul-ruḳhoñ se to mazā har baat meñ

kyā banāvaT kyā khīñchāvaT kyā lagāvaT kyā bigāḌ

mere hāl-e-zār par aa jaa.e tujh ko aap rahm

o banāne vaale mere mujh ko tū itnā bigāḌ

koī hoñ kāfir hoñ yā allāh vaale ai 'riyāz'

chaar din kī zindagānī meñ kisī se kyā bigāḌ

un ke hote kaun dekhe dida-o-dil ka bigaD

paD gaya donon mein fart-e-rashk se kaisa bigaD

us ki mahfil ka muraqqa khinch ai mani magar

is muraqqe mein zara tu ghair ka chehra bigaD

tere jhukne se jhuke hain dil ke lene ko hasin

kam laga kar dam ai zalim na tu sauda bigaD

duKHt-e-raz ko shakl teri dekh kar nafrat na ho

talKHi-e-mai se are zahid na munh itna bigaD

han wahi phir kaba ban jaega ai sheKH-e-haram

but-kade ka pahle naqsha khinch phir naqsha bigaD

ho talluq gul-ruKHon se to maza har baat mein

kya banawaT kya khinchawaT kya lagawaT kya bigaD

mere haal-e-zar par aa jae tujh ko aap rahm

o banane wale mere mujh ko tu itna bigaD

koi hon kafir hon ya allah wale ai 'riyaz'

chaar din ki zindagani mein kisi se kya bigaD