un ke is kufr-e-bayan se kitne afsane bane hain

un ke is kufr-e-bayāñ se kitne afsāne bane haiñ

aap dīvāne nahīñ haiñ aap dīvāne bane haiñ

jab havā kā ruḳh zarā badlā to afsāne bane haiñ

ḳhuun kā rishta thā jin se vo bhī begāne bane haiñ

ham to nām-e-dost ko gin gin ke lenā kufr samjhe

zāhidoñ ke vāste tasbīh ke daane bane haiñ

husn kā jazb-o-asar kyā ā.ina-sāmāñ nahīñ hai

sham.a nādīda hai lekin log parvāne bane haiñ

maut se Takrā ke jiinā un kī shān-e-zindagī hai

harche bādā-bād kahne vaale dīvāne bane haiñ

inqilāb-e-vaqt se pahle kī duniyā ab kahāñ hai

jin meñ raqsāñ chāñdnī thī vo siyah-ḳhāne bane haiñ

ham meñ kuchh apnī jagah haiñ dānish-o-bīnish se aarī

aur banñe kā ye aalam hai ki farzāne bane haiñ

bahs hai is mas.ale par ḳhalvatoñ meñ jalvatoñ meñ

kis ne dīvāna banāyā kitne dīvāne bane haiñ

jis tarah har phuul kī ḳhushbū alag rangat judā hai

fitrat-e-insāñ bhī yūñhī apne begāne bane haiñ

us ke hote sāġhar-o-sahbā kī gunjā.ish nahīñ hai

jis kī āñkhoñ ke namūne par hī maiḳhāne bane haiñ

ham haqīqat hī haqīqat haiñ 'urūj' is ḳhāk-dāñ meñ

is haqīqat ko bhulā dene se afsāne bane haiñ

un ke is kufr-e-bayan se kitne afsane bane hain

aap diwane nahin hain aap diwane bane hain

jab hawa ka ruKH zara badla to afsane bane hain

KHun ka rishta tha jin se wo bhi begane bane hain

hum to nam-e-dost ko gin gin ke lena kufr samjhe

zahidon ke waste tasbih ke dane bane hain

husn ka jazb-o-asar kya aaina-saman nahin hai

shama nadida hai lekin log parwane bane hain

maut se Takra ke jina un ki shan-e-zindagi hai

harche baada-baad kahne wale diwane bane hain

inqilab-e-waqt se pahle ki duniya ab kahan hai

jin mein raqsan chandni thi wo siyah-KHane bane hain

hum mein kuchh apni jagah hain danish-o-binish se aari

aur banne ka ye aalam hai ki farzane bane hain

bahs hai is masale par KHalwaton mein jalwaton mein

kis ne diwana banaya kitne diwane bane hain

jis tarah har phul ki KHushbu alag rangat juda hai

fitrat-e-insan bhi yunhi apne begane bane hain

us ke hote saghar-o-sahba ki gunjaish nahin hai

jis ki aankhon ke namune par hi maiKHane bane hain

hum haqiqat hi haqiqat hain 'uruj' is KHak-dan mein

is haqiqat ko bhula dene se afsane bane hain