un ke partaw ne kiye naqsh ujagar kitne

un ke partav ne kiye naqsh ujāgar kitne

parda-e-dil pe numāyāñ hue manzar kitne

kyā qayāmat hai ki ab ḳhud se bhī rūposhī hai

ġham ubhar aa.e mire qad ke barābar kitne

un ke andāz-e-taġhāful ko ḳhabar tak na huī

merī rusvā.ī ke charche hue ghar-ghar kitne

sar-bulandī kī umīdeñ to liye baiThe haiñ

ham ne sochā nahīñ ilzām haiñ sar par kitne

ġhair to ġhair haiñ apnoñ se bhī pūchhā na gayā

āstīnoñ meñ chhupā rakkhe haiñ ḳhanjar kitne

vaqt paḌne pe ye andāza bhī ho jā.egā

phuul kitne tire dāman meñ haiñ patthar kitne

Duub marnā hī muqaddar hai to ab kyā socheñ

mauj-dar-mauj haiñ sāhil pe samundar kitne

kis ko ma.alūm thā manzil kā pata milte hī

apne me.ayār se gir jā.eñge rahbar kitne

dīda-e-shauq se kis kis kā ta.āruf hogā

ek paikar meñ simaT ā.eñge paikar kitne

sāqī-e-vaqt kī sarshār nigāhī kī qasam

be-piye mast haiñ mai-ḳhāne se bāhar kitne

jab kisī mehr-e-munavvar kī nazar phirtī hai

Duub jaate haiñ sitāroñ ke muqaddar kitne

kis kī taqdīr meñ tauqīr-e-ayāzī hogī

sar-ba-sajda hue mahmūd-o-sikandar kitne

ai 'rishī' jab se na piine kī qasam khaa.ī hai

lab tak aa.e haiñ chhalakte hue sāġhar kitne

un ke partaw ne kiye naqsh ujagar kitne

parda-e-dil pe numayan hue manzar kitne

kya qayamat hai ki ab KHud se bhi ruposhi hai

gham ubhar aae mere qad ke barabar kitne

un ke andaz-e-taghaful ko KHabar tak na hui

meri ruswai ke charche hue ghar-ghar kitne

sar-bulandi ki umiden to liye baiThe hain

hum ne socha nahin ilzam hain sar par kitne

ghair to ghair hain apnon se bhi puchha na gaya

aastinon mein chhupa rakkhe hain KHanjar kitne

waqt paDne pe ye andaza bhi ho jaega

phul kitne tere daman mein hain patthar kitne

Dub marna hi muqaddar hai to ab kya sochen

mauj-dar-mauj hain sahil pe samundar kitne

kis ko malum tha manzil ka pata milte hi

apne meayar se gir jaenge rahbar kitne

dida-e-shauq se kis kis ka taaruf hoga

ek paikar mein simaT aaenge paikar kitne

saqi-e-waqt ki sarshaar nigahi ki qasam

be-piye mast hain mai-KHane se bahar kitne

jab kisi mehr-e-munawwar ki nazar phirti hai

Dub jate hain sitaron ke muqaddar kitne

kis ki taqdir mein tauqir-e-ayazi hogi

sar-ba-sajda hue mahmud-o-sikandar kitne

ai 'rishi' jab se na pine ki qasam khai hai

lab tak aae hain chhalakte hue saghar kitne