un ke wade pe eatibar aaya

un ke va.ade pe e.atibār aaya

phir bhī dil par na iḳhtiyār aaya

aap ke dar pe dil-figār aaya

jo bhī aaya vo ashk-bār aaya

be-qarārī thī dil ke rahne tak

luT gayā dil to phir qarār aaya

ashk āñkhoñ meñ baarī baarī se aa.e

naam hoñToñ pe baar baar aaya

vo na aa.e ye ġham to hai lekin

kam se kam lutf-e-intizār aaya

chāñd niklā ho jaise badlī se

yuuñ achānak ḳhayāl-e-yār aaya

be-ruḳhī par mujhe hañsī aa.ī

barhamī baḌh ga.ī to pyaar aaya

merī āñkhoñ meñ bas ga.iiñ āñkheñ

be-piye is qadar ḳhumār aaya

terā dīvāna josh-e-vahshat meñ

kar ke dāman ko taar taar aaya

mai to rindoñ meñ ho ga.ī taqsīm

tab hamārā kahīñ shumār aaya

shaiḳh badnām hai bahut 'sālik'

mai-kada meñ kabhī-kabhār aaya

un ke wade pe eatibar aaya

phir bhi dil par na iKHtiyar aaya

aap ke dar pe dil-figar aaya

jo bhi aaya wo ashk-bar aaya

be-qarari thi dil ke rahne tak

luT gaya dil to phir qarar aaya

ashk aankhon mein bari bari se aae

nam honTon pe bar bar aaya

wo na aae ye gham to hai lekin

kam se kam lutf-e-intizar aaya

chand nikla ho jaise badli se

yun achanak KHayal-e-yar aaya

be-ruKHi par mujhe hansi aai

barhami baDh gai to pyar aaya

meri aankhon mein bas gain aankhen

be-piye is qadar KHumar aaya

tera diwana josh-e-wahshat mein

kar ke daman ko tar tar aaya

mai to rindon mein ho gai taqsim

tab hamara kahin shumar aaya

shaiKH badnam hai bahut 'salik'

mai-kada mein kabhi-kabhaar aaya