unki bazm-e-naz ka samjhe nahin dastur hum

un kī bazm-e-nāz kā samjhe nahīñ dastūr ham

is liye zabt-e-mohabbat par rahe majbūr ham

haif us dīvāngī par jis se rusvā husn ho

haa.e vo mahbūb jis se ho ga.e mash.hūr ham

aañkh ko zauq-e-tajallī dil ko irfān-e-kamāl

aap kī kis kis ināyat ke hue mashkūr ham

kuchh badal ai husn ye tarz-e-taġhāful kuchh badal

varna phir jaarī kareñge maslak-e-mansūr ham

un ke jalve se ho tābinda nigāh-e-shauq agar

zarre zarre ko banā Dāleñge rashk-e-tūr ham

mutma.in dil yaad se āñkheñ tasavvur se nihāl

ab nahīñ hoñge halāk-e-qismat-e-mahjūr ham

'jauhar' is māhaul meñ urdu kī ḳhidmat farz hai

yuuñ nahīñ irfān-e-fan meñ zarra bhar ma.azūr ham

un ki bazm-e-naz ka samjhe nahin dastur hum

is liye zabt-e-mohabbat par rahe majbur hum

haif us diwangi par jis se ruswa husn ho

hae wo mahbub jis se ho gae mashhur hum

aankh ko zauq-e-tajalli dil ko irfan-e-kamal

aap ki kis kis inayat ke hue mashkur hum

kuchh badal ai husn ye tarz-e-taghaful kuchh badal

warna phir jari karenge maslak-e-mansur hum

un ke jalwe se ho tabinda nigah-e-shauq agar

zarre zarre ko bana Dalenge rashk-e-tur hum

mutmain dil yaad se aankhen tasawwur se nihaal

ab nahin honge halak-e-qismat-e-mahjur hum

'jauhar' is mahaul mein urdu ki KHidmat farz hai

yun nahin irfan-e-fan mein zarra bhar mazur hum