unki gali mein barson rihaish ke bawajud

un kī galī meñ barsoñ rihā.ish ke bāvajūd

hāsil na kar sakā unheñ koshish ke bāvajūd

āñkhoñ se āshkāra nahīñ hone dī tapish

dil meñ dahaktī hijr kī ātish ke bāvajūd

terā huuñ maiñ to tere karam se tirā huuñ maiñ

shaitān aur nafs kī sāzish ke bāvajūd

shāyad uTheñ vo sun ke sarāfīl kī sadā

jo niiñd meñ haiñ chār-sū shorish ke bāvajūd

vo zahr de rahā thā maiñ samjhā sharāb hai

ik muġhbache ke haath kī larzish ke bāvajūd

hairat hai un pe tujh ko nahīñ mānte jo log

shams-o-qamar meñ terī numā.ish ke bāvajūd

ḳhvāhish ke vo baġhair milegā ba-roz-e-hashr

duniyā meñ jo na mil sakā ḳhvāhish ke bāvajūd

'gīlānī' koī aisā na hogā jo hashr meñ

baḳhshā na jaa.e un kī sifārish ke bāvajūd

un ki gali mein barson rihaish ke bawajud

hasil na kar saka unhen koshish ke bawajud

aankhon se aashkara nahin hone di tapish

dil mein dahakti hijr ki aatish ke bawajud

tera hun main to tere karam se tera hun main

shaitan aur nafs ki sazish ke bawajud

shayad uThen wo sun ke sarafil ki sada

jo nind mein hain chaar-su shorish ke bawajud

wo zahr de raha tha main samjha sharab hai

ek mughbache ke hath ki larzish ke bawajud

hairat hai un pe tujh ko nahin mante jo log

shams-o-qamar mein teri numaish ke bawajud

KHwahish ke wo baghair milega ba-roz-e-hashr

duniya mein jo na mil saka KHwahish ke bawajud

'gilani' koi aisa na hoga jo hashr mein

baKHsha na jae un ki sifarish ke bawajud