unki KHwahish aur hai apni tamanna aur hai

un kī ḳhvāhish aur hai apnī tamanna aur hai

aañkh se zāhir hai kuchh dil kā taqāza aur hai

ḳhuub haiñ kyā ḳhuub haiñ ahl-e-siyāsat vaah vaah

dil meñ un ke buġhz hai lekin dikhāvā aur hai

dastaras meñ apnī rakhtā hai vo tūfān-e-hasad

ham ubharte haiñ to vo ham ko dabātā aur hai

tū ki ġhaddār-e-chaman hai maiñ vafādār-e-chaman

merā maqsad aur hai terā irāda aur hai

dekhnā hai tiir lagtā hai ki hotā hai ḳhatā

ruḳh kamāñ kā us taraf lekin nishāna aur hai

ehtirāman har koī sar par biThātā thā hameñ

vo zamāna aur thā ab ye zamāna aur hai

is tazād-e-dil-nashīñ ko kuchh samajhte haiñ hamīñ

dil milātā aur hai āñkheñ dikhātā aur hai

dekh sūrat ko mirī hairat hai kahtā hai 'habīb'

vo to aisā thā nahīñ ye koī lagtā aur hai

un ki KHwahish aur hai apni tamanna aur hai

aankh se zahir hai kuchh dil ka taqaza aur hai

KHub hain kya KHub hain ahl-e-siyasat wah wah

dil mein un ke bughz hai lekin dikhawa aur hai

dastaras mein apni rakhta hai wo tufan-e-hasad

hum ubharte hain to wo hum ko dabaata aur hai

tu ki ghaddar-e-chaman hai main wafadar-e-chaman

mera maqsad aur hai tera irada aur hai

dekhna hai tir lagta hai ki hota hai KHata

ruKH kaman ka us taraf lekin nishana aur hai

ehtiraman har koi sar par biThata tha hamein

wo zamana aur tha ab ye zamana aur hai

is tazad-e-dil-nashin ko kuchh samajhte hain hamin

dil milata aur hai aankhen dikhata aur hai

dekh surat ko meri hairat hai kahta hai 'habib'

wo to aisa tha nahin ye koi lagta aur hai