unki mast aankhon ne kar Dala hai mastana mujhe

un kī mast āñkhoñ ne kar Daalā hai mastāna mujhe

ab nahīñ hai ehtiyāj-e-daur-e-paimāna mujhe

bhuul kar bhī ab nahīñ aatā gulistāñ kā ḳhayāl

is qadar aaya hai raas ai ishq vīrāna mujhe

aap kā dīvāna kahtā hai mujhe saarā jahāñ

aap bhī kah dījiye ik baar dīvāna mujhe

ḳhud hī apnī aag meñ aksar jalā kartā huuñ maiñ

husn ne baḳhshā hai soz-e-ishq-e-parvāna mujhe

dekhiyegā phir mire dil kī junūñ-sāmāniyāñ

dekh luuñ maiñ us ko aur vo chashm-e-masatāna mujhe

bach nahīñ saktā balā-e-barq-o-jaur-e-bād se

kuchh sukūñ dene lagā hai merā kāshāna mujhe

husn se chashmak rahā ho jis kā maqsūd-e-hayāt

baḳhsh dī qudrat ne vo tab.a-e-kalīmāna mujhe

ab yahī hai aarzū 'jauhar' dil-e-betāb meñ

rashk-e-firdaus-e-barīñ ho merā ġham-ḳhāna mujhe

un ki mast aankhon ne kar Dala hai mastana mujhe

ab nahin hai ehtiyaj-e-daur-e-paimana mujhe

bhul kar bhi ab nahin aata gulistan ka KHayal

is qadar aaya hai ras ai ishq virana mujhe

aap ka diwana kahta hai mujhe sara jahan

aap bhi kah dijiye ek bar diwana mujhe

KHud hi apni aag mein aksar jala karta hun main

husn ne baKHsha hai soz-e-ishq-e-parwana mujhe

dekhiyega phir mere dil ki junun-samaniyan

dekh lun main us ko aur wo chashm-e-masatana mujhe

bach nahin sakta bala-e-barq-o-jaur-e-baad se

kuchh sukun dene laga hai mera kashana mujhe

husn se chashmak raha ho jis ka maqsud-e-hayat

baKHsh di qudrat ne wo taba-e-kalimana mujhe

ab yahi hai aarzu 'jauhar' dil-e-betab mein

rashk-e-firdaus-e-barin ho mera gham-KHana mujhe