unki nazar se aaj jo Takra gai nazar

un kī nazar se aaj jo Takrā ga.ī nazar

merā maqām kyā hai ye batlā ga.ī nazar

ta.amīr-e-tāj meñ hai kisī kī vafā kā husn

rauzan se dekhte hue pathrā ga.ī nazar

murjhā gayā hai phuul sā chehrā ye kis liye

kuchh to batāo kis kī tumheñ khā ga.ī nazar

ye to nahīñ zarūrī zabāñ se vo kuchh kaheñ

sab kuchh nazar nazar hī meñ batlā ga.ī nazar

un ko bhulā.e yuuñ to zamāna guzar gayā

dekhā jo un ko aaj to lalchā ga.ī nazar

maazī ko 'fauq' rabt hai kitnā nazar ke saath

dekhā kisī ne mujh ko to sharmā ga.ī nazar

un ki nazar se aaj jo Takra gai nazar

mera maqam kya hai ye batla gai nazar

tamir-e-taj mein hai kisi ki wafa ka husn

rauzan se dekhte hue pathra gai nazar

murjha gaya hai phul sa chehra ye kis liye

kuchh to batao kis ki tumhein kha gai nazar

ye to nahin zaruri zaban se wo kuchh kahen

sab kuchh nazar nazar hi mein batla gai nazar

un ko bhulae yun to zamana guzar gaya

dekha jo un ko aaj to lalcha gai nazar

mazi ko 'fauq' rabt hai kitna nazar ke sath

dekha kisi ne mujh ko to sharma gai nazar