unki nigah-e-lutf ka paigham aa gaya

un kī nigāh-e-lutf kā paiġhām aa gayā

merā ḳhulūs aaj mire kaam aa gayā

fikr-e-sahar ga.ī to ġham-e-shām aa gayā

ab e.atibār-e-gardish-e-ayyām aa gayā

pūchhā kisī ne jab mirī barbādiyoñ kā haal

be-sāḳhta zabāñ pe tirā naam aa gayā

mushkil se tark-e-ishq pe raazī huā thā dil

lo phir nigāh-e-nāz kā paiġhām aa gayā

muddat ke baad hoñToñ pe aane ko thī hañsī

lekin mirī nigāh meñ anjām aa gayā

shukr-e-ḳhudā milīñ dar-e-jānāñ kī Thokareñ

bigḌā huā nasīb mire kaam aa gayā

'raunaq' kisī kī chashm-e-karam be-sabab nahīñ

kuchh baat hai jo merī taraf jaam aa gayā

un ki nigah-e-lutf ka paigham aa gaya

mera KHulus aaj mere kaam aa gaya

fikr-e-sahar gai to gham-e-sham aa gaya

ab eatibar-e-gardish-e-ayyam aa gaya

puchha kisi ne jab meri barbaadiyon ka haal

be-saKHta zaban pe tera nam aa gaya

mushkil se tark-e-ishq pe raazi hua tha dil

lo phir nigah-e-naz ka paigham aa gaya

muddat ke baad honTon pe aane ko thi hansi

lekin meri nigah mein anjam aa gaya

shukr-e-KHuda milin dar-e-jaanan ki Thokaren

bigDa hua nasib mere kaam aa gaya

'raunaq' kisi ki chashm-e-karam be-sabab nahin

kuchh baat hai jo meri taraf jam aa gaya