unki surat jahan nazar aai

un kī sūrat jahāñ nazar aa.ī

dil kī har choT phir ubhar aa.ī

miT ke ham un se haal kyā kahte

pursish-e-ġham pe aañkh bhar aa.ī

dil Thahartā na thā magar Thahrā

maut aatī na thī magar aa.ī

ḳhud ko maiñ DhūñDne lagā us dam

un ke aane kī jab ḳhabar aa.ī

din to furqat kā kaT gayā lekin

raat aa.ī to be-sahar aa.ī

mujh ko dil se bhulāne baiThe haiñ

kyā kareñge vo yaad agar aa.ī

vo jo aa.e to mujh ko hosh aaya

dil-e-gum-gashta kī ḳhabar aa.ī

bhuul kar tum kidhar ye aa nikle

eid ye aaj kis ke ghar aa.ī

tum chhuTe jab se merī duniyā meñ

shaam aa.ī na phir sahar aa.ī

kitnī bebāk hai mohabbat bhī

aañkh milte hī dil meñ dar aa.ī

un ko aanā thā vo nahīñ aa.e

yaad aanī thī umr-bhar aa.ī

chaak karnā paḌā garebāñ ko

baat bantī na jab nazar aa.ī

ġham ko Taalā bahut magar 'sāhir'

ye balā ishq hī ke sar aa.ī

un ki surat jahan nazar aai

dil ki har choT phir ubhar aai

miT ke hum un se haal kya kahte

pursish-e-gham pe aankh bhar aai

dil Thaharta na tha magar Thahra

maut aati na thi magar aai

KHud ko main DhunDne laga us dam

un ke aane ki jab KHabar aai

din to furqat ka kaT gaya lekin

raat aai to be-sahar aai

mujh ko dil se bhulane baiThe hain

kya karenge wo yaad agar aai

wo jo aae to mujh ko hosh aaya

dil-e-gum-gashta ki KHabar aai

bhul kar tum kidhar ye aa nikle

eid ye aaj kis ke ghar aai

tum chhuTe jab se meri duniya mein

sham aai na phir sahar aai

kitni bebak hai mohabbat bhi

aankh milte hi dil mein dar aai

un ko aana tha wo nahin aae

yaad aani thi umr-bhar aai

chaak karna paDa gareban ko

baat banti na jab nazar aai

gham ko Tala bahut magar 'sahir'

ye bala ishq hi ke sar aai