un ko duniya ki bahaaren mujhko zanjiren milin

un ko duniyā kī bahāreñ mujh ko zanjīreñ milīñ

jis ne jaise ḳhvāb dekhe vaisī ta.abīreñ milīñ

apne hī chehroñ pe guzrā ajnabiyyat kā gumāñ

dekhne ko jab hameñ maazī kī tasvīreñ milīñ

har qadam par tohmateñ har saañs meñ zahr-e-alam

kyā kyā duniyā meñ hameñ jiine kī ta.azīreñ milīñ

vaqt ne apnā.e kyā kyā ḳhair-maqdam ke usuul

phuul jin hāthoñ meñ kal the aaj zanjīreñ milīñ

nargisī āñkhoñ kā kājal āñsuoñ meñ bah gayā

phuul se ruḳh par pighalte ġham kī tahrīreñ milīñ

ham ġharīb-e-shahr the gumnāmiyoñ ke darmiyāñ

un kī nisbat se magar ham ko bhī tash.hīreñ milīñ

sang-o-tesha āb-o-sam dasht-e-junūñ dār-o-rasan

sirf ik lafz-e-vafā kī kitnī tafsīreñ milīñ

ātish-e-ehsās-e-ġham meñ 'umr bhar jalte raheñ

ham qalam-kāroñ ko 'tālib' kaisī taqdīreñ milīñ

un ko duniya ki bahaaren mujh ko zanjiren milin

jis ne jaise KHwab dekhe waisi tabiren milin

apne hi chehron pe guzra ajnabiyyat ka guman

dekhne ko jab hamein mazi ki taswiren milin

har qadam par tohmaten har sans mein zahr-e-alam

kya kya duniya mein hamein jine ki taziren milin

waqt ne apnae kya kya KHair-maqdam ke usul

phul jin hathon mein kal the aaj zanjiren milin

nargisi aankhon ka kajal aansuon mein bah gaya

phul se ruKH par pighalte gham ki tahriren milin

hum gharib-e-shahr the gumnamiyon ke darmiyan

un ki nisbat se magar hum ko bhi tashhiren milin

sang-o-tesha aab-o-sam dasht-e-junun dar-o-rasan

sirf ek lafz-e-wafa ki kitni tafsiren milin

aatish-e-ehsas-e-gham mein 'umr bhar jalte rahen

hum qalam-karon ko 'talib' kaisi taqdiren milin