un ko ghurur-e-husn mubarak KHushi ke sath

un ko ġhurūr-e-husn mubārak ḳhushī ke saath

merā junūñ rahegā merī zindagī ke saath

bazm-e-tarab meñ raat ajab mājrā rahā

thā un kā iltifāt magar be-ruḳhī ke saath

kis ko sunā.eñ kis se kaheñ mājrā-e-dil

kāfir-nazar ne luuT liyā sādgī ke saath

dil jāntā hai dil pe jo guzrī hai dosto

jab muskurā diyā koī sharmindagī ke saath

aamad zarūr aaj kisī māh-vash kī hai

ġhunche chaTak rahe haiñ chaman meñ ḳhushī ke saath

yā-rab zabāñ pe kalima-e-tayyab sadā rahe

jiinā isī ke saath ho marnā isī ke saath

aa.ī ajal to apne parā.e judā hue

duniyā meñ 'dard' kaun rahā hai kisī ke saath

un ko ghurur-e-husn mubarak KHushi ke sath

mera junun rahega meri zindagi ke sath

bazm-e-tarab mein raat ajab majra raha

tha un ka iltifat magar be-ruKHi ke sath

kis ko sunaen kis se kahen majra-e-dil

kafir-nazar ne luT liya sadgi ke sath

dil jaanta hai dil pe jo guzri hai dosto

jab muskura diya koi sharmindagi ke sath

aamad zarur aaj kisi mah-wash ki hai

ghunche chaTak rahe hain chaman mein KHushi ke sath

ya-rab zaban pe kalima-e-tayyab sada rahe

jina isi ke sath ho marna isi ke sath

aai ajal to apne parae juda hue

duniya mein 'dard' kaun raha hai kisi ke sath