un se ab apni mulaqat nahin hoti hai

un se ab apnī mulāqāt nahīñ hotī hai

pur-ziyā bazm-e-ḳhayālāt nahīñ hotī hai

giit sāvan kā koī gaa.e to gaa.e kaise

kaif meñ Duubī vo barsāt nahīñ hotī hai

dil ke kaase ko ujāle kī zarūrat hai magar

husn vāloñ kī bhī ḳhairāt nahīñ hotī hai

is qadar gardish-e-hālāt meñ uljhā huuñ ki bas

ḳhud se bhī apnī mulāqāt nahīñ hotī hai

dil meñ añgḌā.iyāñ le le ke rahī jaatī hai

munkashif shoḳhi-e-jazbāt nahīñ hotī hai

un se milne kī tamannā.eñ machaltī haiñ magar

aisī ab sūrat-e-hālāt nahīñ hotī hai

raat phir sub.h ke dāman meñ chalī jā.egī

guftugū kī bhī shurūāt nahīñ hotī hai

kuchh na kuchh is meñ haqīqat kā bhī rahtā hai fusūñ

koī farsūda rivāyāt nahīñ hotī hai

vo bhī rahte haiñ ḳhayālāt kī duniyā meñ magan

'shād' ham se bhī koī baat nahīñ hotī hai

un se ab apni mulaqat nahin hoti hai

pur-ziya bazm-e-KHayalat nahin hoti hai

git sawan ka koi gae to gae kaise

kaif mein Dubi wo barsat nahin hoti hai

dil ke kase ko ujale ki zarurat hai magar

husn walon ki bhi KHairaat nahin hoti hai

is qadar gardish-e-haalat mein uljha hun ki bas

KHud se bhi apni mulaqat nahin hoti hai

dil mein angDaiyan le le ke rahi jati hai

munkashif shoKHi-e-jazbaat nahin hoti hai

un se milne ki tamannaen machalti hain magar

aisi ab surat-e-haalat nahin hoti hai

raat phir subh ke daman mein chali jaegi

guftugu ki bhi shuruat nahin hoti hai

kuchh na kuchh is mein haqiqat ka bhi rahta hai fusun

koi farsuda riwayat nahin hoti hai

wo bhi rahte hain KHayalat ki duniya mein magan

'shad' hum se bhi koi baat nahin hoti hai