un se iqrar-e-wafa ki aarzu karte rahe

un se iqrār-e-vafā kī aarzū karte rahe

umr-bhar ik be-zabāñ se guftugū karte rahe

jis taraf nazreñ uThīñ ik ajnabī chehra milā

ā.ina-ḳhāne meñ apnī justujū karte rahe

tum se mil kar bhī rahā ham ko tumhārā intizār

tum ko pā kar bhī tumhārī aarzū karte rahe

kaun jaane rūnumā huuñ kaun sī jānib se vo

is liye sajde pe sajda chār-sū karte rahe

husn kī gahrā.iyāñ tasvīr-dar-tasvīr thiiñ

aa.ina ham aa.ine ke rū-ba-rū karte rahe

zindagī pābandiyoñ kā naam thī lekin 'razā'

ham to zanjīroñ ko bhī zeb-e-gulū karte rahe

un se iqrar-e-wafa ki aarzu karte rahe

umr-bhar ek be-zaban se guftugu karte rahe

jis taraf nazren uThin ek ajnabi chehra mila

aaina-KHane mein apni justuju karte rahe

tum se mil kar bhi raha hum ko tumhaara intizar

tum ko pa kar bhi tumhaari aarzu karte rahe

kaun jaane runuma hun kaun si jaanib se wo

is liye sajde pe sajda chaar-su karte rahe

husn ki gahraiyan taswir-dar-taswir thin

aaina hum aaine ke ru-ba-ru karte rahe

zindagi pabandiyon ka nam thi lekin 'raza'

hum to zanjiron ko bhi zeb-e-gulu karte rahe