un se kya rasm-o-rah kar baiThe

un se kyā rasm-o-rāh kar baiThe

dil kī duniyā tabāh kar baiThe

ruk gayā haath mere qātil kā

zer-e-ḳhanjar jab aah kar baiThe

bevafā.ī to un kī thī ma.alūm

phir bhī ham un kī chaah kar baiThe

rahmat-e-haq tire bharose par

ham gunah par gunāh kar baiThe

rū-e-tābāñ ko dekh kar tere

sar ko ḳham mehr-o-māh kar baiThe

sahn-e-gulshan huā ḳhizāñ-bar-dosh

ham qafas meñ jo aah kar baiThe

saarī duniyā huī mirī dushman

vo jo mujh par nigāh kar baiThe

raas aa.ī na ziist jab ham ko

maut se rasm-o-rāh kar baiThe

rahm kyā khā.eñ vo 'samī.a' mujh par

qalb hī jab siyāh kar baiThe

un se kya rasm-o-rah kar baiThe

dil ki duniya tabah kar baiThe

ruk gaya hath mere qatil ka

zer-e-KHanjar jab aah kar baiThe

bewafai to un ki thi malum

phir bhi hum un ki chah kar baiThe

rahmat-e-haq tere bharose par

hum gunah par gunah kar baiThe

ru-e-taban ko dekh kar tere

sar ko KHam mehr-o-mah kar baiThe

sahn-e-gulshan hua KHizan-bar-dosh

hum qafas mein jo aah kar baiThe

sari duniya hui meri dushman

wo jo mujh par nigah kar baiThe

ras aai na zist jab hum ko

maut se rasm-o-rah kar baiThe

rahm kya khaen wo 'samia' mujh par

qalb hi jab siyah kar baiThe