muddaton mein jab mile to pas aa kar ro paDe

muddatoñ meñ jab mile to paas aa kar ro paḌe

khil uThe the vo achānak muskurā kar ro paḌe

un se pūchhā maiñ ne jab tark-e-ta.alluq kā sabab

vo mujhe hīroñ jaḌe kangan dikhā kar ro paḌe

jo mirī barbādiyoñ kī sāzisheñ karte rahe

vo fasādī kyoñ mirā chhappar jalā kar ro paḌe

tum se kuchh kahnā hai mujh ko roz kahlāte the vo

mil ga.e to bas laboñ ko kapkapā kar ro paḌe

vaqt-e-ruḳhsat to kahā hañs kar ḳhudā-hāfiz magar

sabr kā jab bāñdh TuuTā duur jā kar ro paḌe

haal jab pūchhā to 'rāhat' ho na paayā zabt-e-hāl

daf.atan āñchal meñ vo chehra chhupā kar ro paḌe

muddaton mein jab mile to pas aa kar ro paDe

khil uThe the wo achanak muskura kar ro paDe

un se puchha main ne jab tark-e-talluq ka sabab

wo mujhe hiron jaDe kangan dikha kar ro paDe

jo meri barbaadiyon ki sazishen karte rahe

wo fasadi kyon mera chhappar jala kar ro paDe

tum se kuchh kahna hai mujh ko roz kahlate the wo

mil gae to bas labon ko kapkapa kar ro paDe

waqt-e-ruKHsat to kaha hans kar KHuda-hafiz magar

sabr ka jab bandh TuTa dur ja kar ro paDe

haal jab puchha to 'rahat' ho na paya zabt-e-haal

dafatan aanchal mein wo chehra chhupa kar ro paDe