un se zahe-nasib mulaqat ho gai

un se zahe-nasīb mulāqāt ho ga.ī

bole bhī kuchh nahīñ to baḌī baat ho ga.ī

āshiq fareb-e-va.ada-e-fardā meñ aa gayā

jaise tumhārī baat koī baat ho ga.ī

dil par jamā jo rang junūn-e-bahār kā

merī ḳhirad bhī shāmil-e-hālāt ho ga.ī

rūThe hue se ham-nafas-o-ham-ḳhayāl haiñ

aise ki jaise ham se koī baat ho ga.ī

vahm-o-gumāñ sab un ke tasavvur meñ bas ga.e

bazm-e-hayāt bazm-e-ḳhayālāt ho ga.ī

tār-e-nafas ne sāz-e-ġham-e-dil sunā diyā

dil kī lagī bhī shāmil-e-naġhmāt ho ga.ī

karne lage gunāh bhī tauba ye kyā huā

kyā bazm-e-zīst bazm-e-ḳhurāfāt ho ga.ī

duniyā kā khel aur bisāt-e-tavahhumāt

āḳhir yahī huā ki hameñ maat ho ga.ī

apnā liyā unhoñ ne to aalam badal gayā

jins-e-vafā jahān meñ sauġhāt ho ga.ī

'ḳhushtar' vo qadr-dānoñ meñ sāz-e-tarab banī

apnī ġhazal bhī hāsil-e-naġhmāt ho ga.ī

un se zahe-nasib mulaqat ho gai

bole bhi kuchh nahin to baDi baat ho gai

aashiq fareb-e-wada-e-farda mein aa gaya

jaise tumhaari baat koi baat ho gai

dil par jama jo rang junun-e-bahaar ka

meri KHirad bhi shamil-e-haalat ho gai

ruThe hue se ham-nafas-o-ham-KHayal hain

aise ki jaise hum se koi baat ho gai

wahm-o-guman sab un ke tasawwur mein bas gae

bazm-e-hayat bazm-e-KHayalat ho gai

tar-e-nafas ne saz-e-gham-e-dil suna diya

dil ki lagi bhi shamil-e-naghmat ho gai

karne lage gunah bhi tauba ye kya hua

kya bazm-e-zist bazm-e-KHurafat ho gai

duniya ka khel aur bisat-e-tawahhumat

aaKHir yahi hua ki hamein mat ho gai

apna liya unhon ne to aalam badal gaya

jins-e-wafa jahan mein saughat ho gai

'KHushtar' wo qadr-danon mein saz-e-tarab bani

apni ghazal bhi hasil-e-naghmat ho gai