unhen dushman se milne ki paDi hai

unheñ dushman se milne kī paḌī hai

yahāñ betābī-e-ġham har ghaḌī hai

kisī sūrat ġham-e-furqat saheñge

kareñ kyā ab to sar par aa paḌī hai

bañdhā hai āñsuoñ kā taar ġham meñ

vo farmāte haiñ sāvan kī jhaḌī hai

chale jaao zarā Thokar lagā kar

hamārī laash raste meñ paḌī hai

nigāh-e-yār sharmā.ī huī hai

ḳhudā mā'lūm kis kis se laḌī hai

nahīñ hai pāsbāñ dar par tumhāre

qayāmat hai ki ḳhud aa kar khaḌī hai

adā-e-ishq se kab āshnā the

tabī'at aap hī se kuchh laḌī hai

taḌapte zindagī bhar us ko dekhā

nazar jis par tirī jā kar paḌī hai

na kyoñ qaa.il huuñ us sannā.a kā maiñ

ye sūrat jis ne fursat meñ ghaḌī hai

na.e raste nikāle shauq ne phir

tabī'at jab kabhī apnī aḌī hai

hujūm itnā hai kyoñ dar par tumhāre

yahāñ kyā husn kī daulat gaḌī hai

nahīñ hai dil meñ ye sūrat kisī kī

koī tasvīr shīshe meñ jaḌī hai

tumhārā naam hai har dam zabāñ par

tumhārī yaad dil ko har ghaḌī hai

ye hai kis fitna-gar kī aamad aamad

jigar thāme hue ḳhilqat khaḌī hai

ġham-e-furqat se kyūñkar jaan chhūTe

baḌī mushkil meñ ab ye jā paḌī hai

'ayādat ko marīz-e-ġham kī aao

ki us kī maut ab sar par khaḌī hai

abhī se vasl kā armān ai dil

abhī to hijr kī manzil paḌī hai

muqaddar ne diyā hai saath kyā kyā

nigah us but se haT haT kar laḌī hai

tumhāre lab ko kyā nisbat kisī se

gul-e-tar kī ye nāzuk pankhuḌī hai

sañbhal kar rāh-e-ulfat meñ qadam rakh

are nādān ye manzil kaḌī hai

mohabbat meñ jo dil uljhā hai dil se

nazar un kī nazar se jā laḌī hai

kiyā hai muntaḳhab dil ne unhīñ ko

nazar lākhoñ meñ un par jā paḌī hai

milā hai 'ishq meñ jo ranj 'hājir'

vo us zanjīr kī pahlī kaḌī hai

unhen dushman se milne ki paDi hai

yahan betabi-e-gham har ghaDi hai

kisi surat gham-e-furqat sahenge

karen kya ab to sar par aa paDi hai

bandha hai aansuon ka tar gham mein

wo farmate hain sawan ki jhaDi hai

chale jao zara Thokar laga kar

hamari lash raste mein paDi hai

nigah-e-yar sharmai hui hai

KHuda ma'lum kis kis se laDi hai

nahin hai pasban dar par tumhaare

qayamat hai ki KHud aa kar khaDi hai

ada-e-ishq se kab aashna the

tabi'at aap hi se kuchh laDi hai

taDapte zindagi bhar us ko dekha

nazar jis par teri ja kar paDi hai

na kyon qail hun us sannaa ka main

ye surat jis ne fursat mein ghaDi hai

nae raste nikale shauq ne phir

tabi'at jab kabhi apni aDi hai

hujum itna hai kyon dar par tumhaare

yahan kya husn ki daulat gaDi hai

nahin hai dil mein ye surat kisi ki

koi taswir shishe mein jaDi hai

tumhaara nam hai har dam zaban par

tumhaari yaad dil ko har ghaDi hai

ye hai kis fitna-gar ki aamad aamad

jigar thame hue KHilqat khaDi hai

gham-e-furqat se kyunkar jaan chhuTe

baDi mushkil mein ab ye ja paDi hai

'ayaadat ko mariz-e-gham ki aao

ki us ki maut ab sar par khaDi hai

abhi se wasl ka arman ai dil

abhi to hijr ki manzil paDi hai

muqaddar ne diya hai sath kya kya

nigah us but se haT haT kar laDi hai

tumhaare lab ko kya nisbat kisi se

gul-e-tar ki ye nazuk pankhuDi hai

sanbhal kar rah-e-ulfat mein qadam rakh

are nadan ye manzil kaDi hai

mohabbat mein jo dil uljha hai dil se

nazar un ki nazar se ja laDi hai

kiya hai muntaKHab dil ne unhin ko

nazar lakhon mein un par ja paDi hai

mila hai 'ishq mein jo ranj 'hajir'

wo us zanjir ki pahli kaDi hai