انہیں ہم سالک راہ فنا اے دل سمجھتے ہیں

انہیں ہم سالک راہ فنا اے دل سمجھتے ہیں

جو اپنے ہر نفس کو آخری منزل سمجھتے ہیں

اسے ہم دولت کونین کا حاصل سمجھتے ہیں

جسے سب دور کہتے ہیں جسے سب دل سمجھتے ہیں

وہی کچھ سجدہ ہائے شوق کا حاصل سمجھتے ہیں

جو اس کے قرب کو فردوس جان و دل سمجھتے ہیں

نشاں ہے میرے سجدے کا جو اک راہ محبت میں

اسی کو سب چراغ سرحد منزل سمجھتے ہیں

نہ وہ قاتل نہ ان کی چشم و مژگان و نظر قاتل

ہم اپنے دل کو خود اپنے لئے قاتل سمجھتے ہیں

کوئی اس ارتباط باہمی کے راز کیا جانے

جسے وہ تیر کہتے ہیں اسے ہم دل سمجھتے ہیں

وہ اک ہلکا سا پرتو ہے مرے داغ محبت کا

جسے اہل جہاں نیرؔ مہ کامل سمجھتے ہیں