unhen hum salik-e-rah-e-fana ai dil samajhte hain

unheñ ham sālik-e-rāh-e-fanā ai dil samajhte haiñ

jo apne har-nafas ko āḳhrī manzil samajhte haiñ

use ham daulat-e-kaunain kā hāsil samajhte haiñ

jise sab duur kahte haiñ jise sab dil samajhte haiñ

vahī kuchh sajda-hā-e-shauq kā hāsil samajhte haiñ

jo us ke qurb ko firdaus-e-jān-o-dil samajhte haiñ

nishāñ hai mere sajde kā jo ik rāh-e-mohabbat meñ

usī ko sab charāġh-e-sarhad-e-manzil samajhte haiñ

na vo qātil na un kī chashm-o-mizhgān-o-nazar qātil

ham apne dil ko ḳhud apne liye qātil samajhte haiñ

koī is irtibāt-e-bāhamī ke raaz kyā jaane

jise vo tiir kahte haiñ use ham dil samajhte haiñ

vo ik halkā sā partav hai mire dāġh-e-mohabbat kā

jise ahl-e-jahāñ 'nayyar' mah-e-kāmil samajhte haiñ

unhen hum salik-e-rah-e-fana ai dil samajhte hain

jo apne har-nafas ko aaKHri manzil samajhte hain

use hum daulat-e-kaunain ka hasil samajhte hain

jise sab dur kahte hain jise sab dil samajhte hain

wahi kuchh sajda-ha-e-shauq ka hasil samajhte hain

jo us ke qurb ko firdaus-e-jaan-o-dil samajhte hain

nishan hai mere sajde ka jo ek rah-e-mohabbat mein

usi ko sab charagh-e-sarhad-e-manzil samajhte hain

na wo qatil na un ki chashm-o-mizhgan-o-nazar qatil

hum apne dil ko KHud apne liye qatil samajhte hain

koi is irtibaat-e-bahami ke raaz kya jaane

jise wo tir kahte hain use hum dil samajhte hain

wo ek halka sa partaw hai mere dagh-e-mohabbat ka

jise ahl-e-jahan 'nayyar' mah-e-kaamil samajhte hain