unhen haqiqat-e-ah-o-fughan nahin malum

unheñ haqīqat-e-āh-o-fuġhāñ nahīñ ma.alūm

kahāñ hai aag kidhar hai dhuāñ nahīñ ma.alūm

kisī kī yaad jab aatī hai Duub jaatā hai

kuchh aur hāl-e-dil-e-nā-tavāñ nahīñ ma.alūm

badal ke ḳhush haiñ vo andāz-e-jaur ko apne

badal chukā huuñ maiñ tarz-e-fuġhāñ nahīñ ma.alūm

ġham-e-chaman ke sile meñ milā qafas hamdam

abhī ma.āl-e-ġham-e-āshiyāñ nahīñ ma.alūm

nazar-farebī-e-husn-e-butāñ kā qaa.il huuñ

fareb-kārī-e-ahl-e-jahāñ nahīñ ma.alūm

abhī hai sahn-e-chaman meñ abhī nasheman par

giregī aaj ye bijlī kahāñ nahīñ ma.alūm

zabāñ pe ġhuncha-o-gul kī ubuur hai lekin

mujhe ḳhud apne hī dil kī zabāñ nahīñ ma.alūm

nafas kī āmad-o-shud kī hai be-nishāñ manzil

kahāñ pe jā ke ruke kārvāñ nahīñ ma.alūm

hazāroñ dar pe jhukāyā hai sar magar 'nātiq'

jabīñ ke saath jhukā dil kahāñ nahīñ ma.alūm

unhen haqiqat-e-ah-o-fughan nahin malum

kahan hai aag kidhar hai dhuan nahin malum

kisi ki yaad jab aati hai Dub jata hai

kuchh aur haal-e-dil-e-na-tawan nahin malum

badal ke KHush hain wo andaz-e-jaur ko apne

badal chuka hun main tarz-e-fughan nahin malum

gham-e-chaman ke sile mein mila qafas hamdam

abhi maal-e-gham-e-ashiyan nahin malum

nazar-farebi-e-husn-e-butan ka qail hun

fareb-kari-e-ahl-e-jahan nahin malum

abhi hai sahn-e-chaman mein abhi nasheman par

giregi aaj ye bijli kahan nahin malum

zaban pe ghuncha-o-gul ki ubur hai lekin

mujhe KHud apne hi dil ki zaban nahin malum

nafas ki aamad-o-shud ki hai be-nishan manzil

kahan pe ja ke ruke karwan nahin malum

hazaron dar pe jhukaya hai sar magar 'natiq'

jabin ke sath jhuka dil kahan nahin malum