us dard se bhi tujhse jo mansub raha hai

us dard se bhī tujh se jo mansūb rahā hai

har chiiz se har shaḳhs se man uub rahā hai

kyā jāniye kal sub.h ubhartā hai kidhar se

ik dil jo sar-e-shām kahīñ Duub rahā hai

ab hosh meñ aaya huuñ to achchhā hai ye uslūb

mai pī ke bahaknā bhī magar ḳhuub rahā hai

hairāñ huuñ use kaise na pahchān sakā maiñ

vo shaḳhs jo barsoñ mirā matlūb rahā hai

zāhir hai tire tark-e-ta.alluq kī adā se

ik vaqt meñ tū kitnoñ kā mahbūb rahā hai

chaḌhte hue sūraj ko salām us kā bhī kah do

jo shaḳhs sar-e-vādi-e-shab Duub rahā hai

munkir hai na.e daur kā har fard hī us se

sadiyoñ se zamāne kā jo uslūb rahā hai

us dard se bhi tujh se jo mansub raha hai

har chiz se har shaKHs se man ub raha hai

kya jaaniye kal subh ubharta hai kidhar se

ek dil jo sar-e-sham kahin Dub raha hai

ab hosh mein aaya hun to achchha hai ye uslub

mai pi ke bahakna bhi magar KHub raha hai

hairan hun use kaise na pahchan saka main

wo shaKHs jo barson mera matlub raha hai

zahir hai tere tark-e-talluq ki ada se

ek waqt mein tu kitnon ka mahbub raha hai

chaDhte hue suraj ko salam us ka bhi kah do

jo shaKHs sar-e-wadi-e-shab Dub raha hai

munkir hai nae daur ka har fard hi us se

sadiyon se zamane ka jo uslub raha hai