us husn ka shaida hun us husn ka diwana

us husn kā shaidā huuñ us husn kā dīvāna

har gul hai jahāñ bulbul har sham.a hai parvāna

patthar paḌeñ donoñ par ka.aba ho ki but-ḳhāna

donoñ se kahīñ achchhā dīvāne kā parvāna

kahtā hai anā lailā kaisā hai ye dīvāna

nibhne kā nahīñ do din ab qais se yārāna

ka.aba ho kalīsā ho dil ho ki sanam-ḳhāna

jalva ho jahāñ terā ābād vo kāshāna

chhoTā sā mirā dil hai TuuTā sā mirā dil hai

sūrat meñ to paimāna vus.at meñ hai mai-ḳhāna

dil se hai lagī ye lo ik zarra barābar zau

paḌ jaa.e tirā partav ai jalva-e-jānāna

begāna yagāna hai dil ā.īna-ḳhāna hai

ka.abe kā ye ka.aba hai but-ḳhāne kā but-ḳhāna

hai josh-e-junūñ par vo ai ishq-e-ḳhirad-āgah

farzāna hai dīvāna dīvāna hai farzāna

farhād bhī majnūñ bhī lete haiñ qadam mere

aisā bhī na ho koī is ishq meñ dīvāna

yaad aa.ī bahut ham ko TuuTī huī tauba bhī

dekhā jo kahīñ ham ne TuuTā huā paimāna

shīshe kī parī tujh meñ kyā husn kā aalam hai

saaqī na ho phir bhī to ye ghar hai parī-ḳhāna

de koī sakhī daatā mai-ḳhāna baḌā ghar hai

aatā hai sadā detā shab ko koī mastāna

bahke hue logoñ meñ sab se haiñ 'riyāz' achchhe

raftār hai mastāna guftār hai rindāna

us husn ka shaida hun us husn ka diwana

har gul hai jahan bulbul har shama hai parwana

patthar paDen donon par kaba ho ki but-KHana

donon se kahin achchha diwane ka parwana

kahta hai ana laila kaisa hai ye diwana

nibhne ka nahin do din ab qais se yarana

kaba ho kalisa ho dil ho ki sanam-KHana

jalwa ho jahan tera aabaad wo kashana

chhoTa sa mera dil hai TuTa sa mera dil hai

surat mein to paimana wusat mein hai mai-KHana

dil se hai lagi ye lo ek zarra barabar zau

paD jae tera partaw ai jalwa-e-jaanana

begana yagana hai dil aaina-KHana hai

kabe ka ye kaba hai but-KHane ka but-KHana

hai josh-e-junun par wo ai ishq-e-KHirad-agah

farzana hai diwana diwana hai farzana

farhad bhi majnun bhi lete hain qadam mere

aisa bhi na ho koi is ishq mein diwana

yaad aai bahut hum ko TuTi hui tauba bhi

dekha jo kahin hum ne TuTa hua paimana

shishe ki pari tujh mein kya husn ka aalam hai

saqi na ho phir bhi to ye ghar hai pari-KHana

de koi sakhi data mai-KHana baDa ghar hai

aata hai sada deta shab ko koi mastana

bahke hue logon mein sab se hain 'riyaz' achchhe

raftar hai mastana guftar hai rindana