us jangal se jab guzroge to ek shiwala aaega

us jañgal se jab guzroge to ek shivāla aa.egā

vahāñ ruk jaanā vahāñ rah jaanā vahāñ sukh kā ujālā aa.egā

ye soch ke uThnā har din tum is dil kā phuul khilegā zarūr

is aas pe sonā ab kī shab koī ḳhvāb nirālā aa.egā

jab us ke haath nayā maazī is saf.ha-e-arz pe likkheñge

jab sahar o shaam raqam hoñge tab merā havāla aa.egā

is be-andesha sahrā meñ is ūñghne vaalī ummat par

kab jāgne vaalā utregā kab sochne vaalā aa.egā

phir rūheñ zaḳhmī zaḳhmī haiñ phir koḌh se dukhne aa.e badan

yuuñ lagtā hai ki shafā.at ko phir koī gvālā aa.egā

ai rāh-e-suḳhan ke rāh-ravo dil-shād raho is raah meñ bhī

ḳhushbū kī savārī Thahregī rañgoñ kā piyāla aa.egā

us jangal se jab guzroge to ek shiwala aaega

wahan ruk jaana wahan rah jaana wahan sukh ka ujala aaega

ye soch ke uThna har din tum is dil ka phul khilega zarur

is aas pe sona ab ki shab koi KHwab nirala aaega

jab us ke hath naya mazi is safha-e-arz pe likkhenge

jab sahar o sham raqam honge tab mera hawala aaega

is be-andesha sahra mein is unghne wali ummat par

kab jagne wala utrega kab sochne wala aaega

phir ruhen zaKHmi zaKHmi hain phir koDh se dukhne aae badan

yun lagta hai ki shafaat ko phir koi gwala aaega

ai rah-e-suKHan ke rah-rawo dil-shad raho is rah mein bhi

KHushbu ki sawari Thahregi rangon ka piyala aaega