us ka manzar to sab guman mein tha

us kā manzar to sab gumān meñ thā

sirf saaya hī us makān meñ thā

dost merā thā aur na us kā vo

ik ajab shaḳhs darmiyāñ meñ thā

sar barahna thā harf-harf meñ vo

pā-ba-jaulāñ har ik nishān meñ thā

sabz aur surḳh thā badan us kā

aur hañstā huā sā jaan meñ thā

vo madad ko pukārtā kis ko

āḳhirī shaḳhs imtihān meñ thā

mauj-e-dariyā se uTh rahā thā dhuāñ

tishna-lab koī apnī shaan meñ thā

āñdhiyāñ chal rahī thiiñ tīroñ kī

ik diyā thā jo apnī aan meñ thā

saarā manzar lahū lahū thā jab

āsmāñ bhī ajiib shaan meñ thā

hashr barpā thā mere siine meñ

shor sā ek merī jaan meñ thā

karbalā par utar rahī thī shaam

maiñ usī vaqt kī kamān meñ thā

thā pare sach ke aur sach koī

ye bhī 'ajmal' hamāre dhyān meñ thā

us ka manzar to sab guman mein tha

sirf saya hi us makan mein tha

dost mera tha aur na us ka wo

ek ajab shaKHs darmiyan mein tha

sar barahna tha harf-harf mein wo

pa-ba-jaulan har ek nishan mein tha

sabz aur surKH tha badan us ka

aur hansta hua sa jaan mein tha

wo madad ko pukarta kis ko

aaKHiri shaKHs imtihan mein tha

mauj-e-dariya se uTh raha tha dhuan

tishna-lab koi apni shan mein tha

aandhiyan chal rahi thin tiron ki

ek diya tha jo apni aan mein tha

sara manzar lahu lahu tha jab

aasman bhi ajib shan mein tha

hashr barpa tha mere sine mein

shor sa ek meri jaan mein tha

karbala par utar rahi thi sham

main usi waqt ki kaman mein tha

tha pare sach ke aur sach koi

ye bhi 'ajmal' hamare dhyan mein tha