us ka wada ta-qayamat kam se kam

us kā va.ada tā-qayāmat kam se kam

aur yahāñ marne kī fursat kam se kam

sah sake dard-e-mohabbat kam se kam

dil meñ itnī to ho tāqat kam se kam

is kī yādoñ se kahāñ hai dushmanī

sham.a jaltī shām-e-furqat kam se kam

us ke milne se na hotī raushnī

ghaT to jaatī ġham kī zulmat kam se kam

dekhne se un ke ye hāsil huā

ho ga.ī apnī ziyārat kam se kam

us ke ḳhat meñ aur sab kuchh thā magar

sirf matlab kī ibārat kam se kam

dard dene ke vahāñ sāmāñ bahut

aur taḌapne kī ijāzat kam se kam

kyuuñ ġham-e-daurāñ ziyāda mil gayā

thī hameñ jis kī zarūrat kam se kam

ḳhair tum se dostī mushkil sahī

rahne do sāhib-salāmat kam se kam

dekh kar un ko ye andāza huā

hogī aisī hī qayāmat kam se kam

daulat-e-ġham kī farāvānī sahī

dāman-e-dil meñ hai vus.at kam se kam

ġham nahīñ jo chand yādeñ saath thiiñ

kar to lī dil kī hifāzat kam se kam

sīna-chākī umr bhar kī hai 'sabā'

zaḳhm silne kī thī muddat kam se kam

us ka wada ta-qayamat kam se kam

aur yahan marne ki fursat kam se kam

sah sake dard-e-mohabbat kam se kam

dil mein itni to ho taqat kam se kam

is ki yaadon se kahan hai dushmani

shama jalti sham-e-furqat kam se kam

us ke milne se na hoti raushni

ghaT to jati gham ki zulmat kam se kam

dekhne se un ke ye hasil hua

ho gai apni ziyarat kam se kam

us ke KHat mein aur sab kuchh tha magar

sirf matlab ki ibarat kam se kam

dard dene ke wahan saman bahut

aur taDapne ki ijazat kam se kam

kyun gham-e-dauran ziyaada mil gaya

thi hamein jis ki zarurat kam se kam

KHair tum se dosti mushkil sahi

rahne do sahib-salamat kam se kam

dekh kar un ko ye andaza hua

hogi aisi hi qayamat kam se kam

daulat-e-gham ki farawani sahi

daman-e-dil mein hai wusat kam se kam

gham nahin jo chand yaaden sath thin

kar to li dil ki hifazat kam se kam

sina-chaaki umr bhar ki hai 'saba'

zaKHm silne ki thi muddat kam se kam