uske badan ka lams abhi ungliyon mein hai

us ke badan kā lams abhī uñgliyoñ meñ hai

ḳhushbū vo chāñdnī kī mire zā.iqoñ meñ hai

maiñ soch ke bhañvar meñ thā jis shaḳhs ke liye

vo ḳhud bhī kuchh dinoñ se baḌī uljhanoñ meñ hai

us kā vajūd ḳhāmushī kā ishtihār hai

lagtā hai ek umr se vo maqbaroñ meñ hai

maiñ āsmāñ pe naqsh nahīñ huuñ magar suno

ab bhī mirī shabīh ka.ī sūrajoñ meñ hai

merī tarah labāda ḳhamoshī kā oḌh le

apnā kiyā-dharā hai jo ab jholiyoñ meñ hai

maiñ kore kāġhazoñ kī qatāreñ udaas udaas

guzrī rutoñ ke dukh kī thakan bādaloñ meñ hai

har chand kā.enāt rahī be-karāñ magar

insān ibtidā hī se kuchh dā.eroñ meñ hai

us ke badan ka lams abhi ungliyon mein hai

KHushbu wo chandni ki mere zaiqon mein hai

main soch ke bhanwar mein tha jis shaKHs ke liye

wo KHud bhi kuchh dinon se baDi uljhanon mein hai

us ka wajud KHamushi ka ishtihaar hai

lagta hai ek umr se wo maqbaron mein hai

main aasman pe naqsh nahin hun magar suno

ab bhi meri shabih kai surajon mein hai

meri tarah labaada KHamoshi ka oDh le

apna kiya-dhara hai jo ab jholiyon mein hai

main kore kaghazon ki qataren udas udas

guzri ruton ke dukh ki thakan baadalon mein hai

har chand kaenat rahi be-karan magar

insan ibtida hi se kuchh daeron mein hai