uske dil mein ye kya samai baat

us ke dil meñ ye kyā samā.ī baat

ġhair se merī jā lagā.ī baat

us ko kis ne ye jā sunā.ī baat

ġhair ke haath kaise aa.ī baat

kuchh kahā us ne jab to phuul jhaḌe

vaah kyā ruḳh pe rang laa.ī baat

ye burī baat hai bachā ḳhud ko

chhup ke suntā hai kyoñ parā.ī baat

us se kyā kahnā chāhtā thā maiñ

bhuul kar bhī na yaad aa.ī baat

kyoñ huā mujh pe mehrbāñ itnā

kaun sī us ko merī bhaa.ī baat

maiñ hamesha rahā huuñ mohar-ba-lab

maiñ ne kab kī hai jag-hañsā.ī baat

kar diyā raaz ḳhud hī tasht-az-bām

kyoñ zabāñ par ye terī aa.ī baat

ab ta.assuf fuzūl hai 'ḳhāvar'

tū ne ḳhud hī kahāñ chhupā.ī baat

us ke dil mein ye kya samai baat

ghair se meri ja lagai baat

us ko kis ne ye ja sunai baat

ghair ke hath kaise aai baat

kuchh kaha us ne jab to phul jhaDe

wah kya ruKH pe rang lai baat

ye buri baat hai bacha KHud ko

chhup ke sunta hai kyon parai baat

us se kya kahna chahta tha main

bhul kar bhi na yaad aai baat

kyon hua mujh pe mehrban itna

kaun si us ko meri bhai baat

main hamesha raha hun mohar-ba-lab

main ne kab ki hai jag-hansai baat

kar diya raaz KHud hi tasht-az-baam

kyon zaban par ye teri aai baat

ab tassuf fuzul hai 'KHawar'

tu ne KHud hi kahan chhupai baat