uske dil tak nahin pahuncha koi rasta sidha

us ke dil tak nahīñ pahuñchā koī rasta sīdhā

is liye kahne lagā ishq ko ulTā-sīdhā

jis tarah se vo batāte haiñ tujhe uzr apne

is kā matlab to taġhāful hī hai sīdhā sīdhā

ham agar tujh meñ samā jaa.eñ to hairat kaisī

aa ke girtā hai samandar meñ hī dariyā sīdhā

ham ne us naam kī hurmat ko bachā.e rakkhā

log karte rahe jis naam pe paisā sīdhā

kyoñ mujhe biich meñ khīñchā gayā ma.alūm nahīñ

merā ḳhud se to nahīñ thā koī jhagḌā sīdhā

is zamāne kī mohabbat ke usūloñ pe chaleñ

is zamāne meñ bhalā kaun hai itnā sīdhā

kis ke kirdār ke azmat kī duhā.ī maiñ duuñ

nek laḌkī hai koī aur na laḌkā sīdhā

maiñ agar bhaag bhī niklūñ to bhaTak jā.ūñgā

shahr-e-qātil meñ nahīñ ek bhī rastā sīdhā

bahr-o-bar meñ vahī gum-gashta huā hai 'harshit'

ishq kī raah ko jis jis ne bhī samjhā sīdhā

us ke dil tak nahin pahuncha koi rasta sidha

is liye kahne laga ishq ko ulTa-sidha

jis tarah se wo batate hain tujhe uzr apne

is ka matlab to taghaful hi hai sidha sidha

hum agar tujh mein sama jaen to hairat kaisi

aa ke girta hai samandar mein hi dariya sidha

hum ne us nam ki hurmat ko bachae rakkha

log karte rahe jis nam pe paisa sidha

kyon mujhe bich mein khincha gaya malum nahin

mera KHud se to nahin tha koi jhagDa sidha

is zamane ki mohabbat ke usulon pe chalen

is zamane mein bhala kaun hai itna sidha

kis ke kirdar ke azmat ki duhai main dun

nek laDki hai koi aur na laDka sidha

main agar bhag bhi niklun to bhaTak jaunga

shahr-e-qatil mein nahin ek bhi rasta sidha

bahr-o-bar mein wahi gum-gashta hua hai 'harshit'

ishq ki rah ko jis jis ne bhi samjha sidha