uske gham mein hayat bhul gae

us ke ġham meñ hayāt bhuul ga.e

raunaq-e-kā.enāt bhuul ga.e

ek muddat meñ to mile us se

phir bhī kahne kī baat bhuul ga.e

ik hasīñ vārdāt ke aage

ziist ke hādsāt bhuul ga.e

ishq meñ log ham se kyā badle

vo bhī to iltifāt bhuul ga.e

kitne be-ḳhud haiñ us ke ġham ke sivā

talḳhī-e-vāqi.āt bhuul ga.e

aish-o-ishrat meñ kho ga.e itnā

hastī-e-be-sabāt bhuul ga.e

us se mil kar the is qadar ḳhush ham

ki har ik ġham kī raat bhuul ga.e

māl-o-zar haath kyā lagā un ke

log apnī bhī zaat bhuul ga.e

zehn par itnā chhā ga.e vo 'zafar'

fikr-e-maut-o-hayāt bhuul ga.e

us ke gham mein hayat bhul gae

raunaq-e-kaenat bhul gae

ek muddat mein to mile us se

phir bhi kahne ki baat bhul gae

ek hasin wardat ke aage

zist ke hadsat bhul gae

ishq mein log hum se kya badle

wo bhi to iltifat bhul gae

kitne be-KHud hain us ke gham ke siwa

talKHi-e-waqiat bhul gae

aish-o-ishrat mein kho gae itna

hasti-e-be-sabaat bhul gae

us se mil kar the is qadar KHush hum

ki har ek gham ki raat bhul gae

mal-o-zar hath kya laga un ke

log apni bhi zat bhul gae

zehn par itna chha gae wo 'zafar'

fikr-e-maut-o-hayat bhul gae