uske hathon ka banaya hua shahkar hun main

us ke hāthoñ kā banāyā huā shahkār huuñ maiñ

aur kuchh log samajhte haiñ ki be-kār huuñ maiñ

merā is husn ke bāzār meñ kuchh mol nahīñ

maiñ banī-ḳhāk huuñ aur ḳhaak kā haqdār huuñ maiñ

mujh ko be-sāḳhta āvāz na de andar se

aarzī lams kī shiddat meñ giraftār huuñ maiñ

vo safar-sāz thā so us kā diyā raushan thā

maiñ junūñ-sāz huuñ aur hāmil-e-raftār huuñ maiñ

terī duniyā se sañbhālā na gayā merā vajūd

aur āḳhir pe jo hotā hai vo inkār huuñ maiñ

dast-basta huuñ kabhī vaqt kī parkār tale

aur kabhī apnī balā se vahī parkār huuñ maiñ

dil lagātā hī gayā shāh-e-najaf kā na.ara

jism kartā rahā isrār ki bīmār huuñ maiñ

mujh ko is daur kī āvāz na samjho 'rāsiḳh'

apne hī dard kā bosīda taraf-dār huuñ maiñ

us ke hathon ka banaya hua shahkar hun main

aur kuchh log samajhte hain ki be-kar hun main

mera is husn ke bazar mein kuchh mol nahin

main bani-KHak hun aur KHak ka haqdar hun main

mujh ko be-saKHta aawaz na de andar se

aarzi lams ki shiddat mein giraftar hun main

wo safar-saz tha so us ka diya raushan tha

main junun-saz hun aur hamil-e-raftar hun main

teri duniya se sanbhaala na gaya mera wajud

aur aaKHir pe jo hota hai wo inkar hun main

dast-basta hun kabhi waqt ki parkar tale

aur kabhi apni bala se wahi parkar hun main

dil lagata hi gaya shah-e-najaf ka nara

jism karta raha israr ki bimar hun main

mujh ko is daur ki aawaz na samjho 'rasiKH'

apne hi dard ka bosida taraf-dar hun main