uske hone ki KHabar shahr mein dil ne pai

us ke hone kī ḳhabar shahr meñ dil ne paa.ī

koī saa.at kī bhī fursat nahīñ milne paa.ī

haath pe rakkhūñ tire naqsh ubhar aate haiñ

kyā sifat dekh tū is shahr kī gil ne paa.ī

ishq ne mujh ko jalā Daalā hai sho.ala ban kar

maiñ ridā dard kī sozan se na silne paa.ī

ham ko tanhā.ī ne toḌā kiyā reza reza

zaḳhm-e-dil hijr kī bārish to na jhilne paa.ī

tū faqat aa.ina dīvār pe āvezāñ hai

tujh meñ rangat mire chehre kī na khilne paa.ī

apnī āñkhoñ meñ liye phirte haiñ duniyā vaale

kyā fazīlat mire ruḳhsār ke til ne paa.ī

zalzale aa.e gire laakh shahāb-e-sāqib

par zamīñ markaz-o-mehvar se na hilne paa.ī

us ke hone ki KHabar shahr mein dil ne pai

koi saat ki bhi fursat nahin milne pai

hath pe rakkhun tere naqsh ubhar aate hain

kya sifat dekh tu is shahr ki gil ne pai

ishq ne mujh ko jala Dala hai shoala ban kar

main rida dard ki sozan se na silne pai

hum ko tanhai ne toDa kiya reza reza

zaKHm-e-dil hijr ki barish to na jhilne pai

tu faqat aaina diwar pe aawezan hai

tujh mein rangat mere chehre ki na khilne pai

apni aankhon mein liye phirte hain duniya wale

kya fazilat mere ruKHsar ke til ne pai

zalzale aae gire lakh shahab-e-saqib

par zamin markaz-o-mehwar se na hilne pai