uske insan ko jagana hai

us ke insān ko jagānā hai

ek patthar ko ab rulānā hai

yā kisī ḳhvāb yā kisī dil meñ

aur apnā kahāñ Thikānā hai

hasb-e-ma.amūl maut aa.egī

hasb-e-ma.amūl ham ko jaanā hai

jis ko dil se nikāl pheñkā hai

ab use DhūñDne bhī jaanā hai

ek āvārgī kā qissa hai

dasht ko raat bhar sunānā hai

dekhnā dūr-dūr se us ko

khel achchhā hai par purānā hai

ik hazīñ ḳhvāb do hasīñ āñkheñ

aur kyā zindagī se paanā hai

ab jo dil kī ḳhalā meñ utre haiñ

ek dīvār ko uThānā hai

zindagī ek chhoTī sī rūdād

milte jaanā bichhaḌte jaanā hai

duur se dekhnā hai hasrat ko

fāsla darmiyāñ bichhānā hai

vaqt kā sab kiyā dharā 'mīrā'

ye ḳhizā.eñ to ik bahānā hai

us ke insan ko jagana hai

ek patthar ko ab rulana hai

ya kisi KHwab ya kisi dil mein

aur apna kahan Thikana hai

hasb-e-mamul maut aaegi

hasb-e-mamul hum ko jaana hai

jis ko dil se nikal phenka hai

ab use DhunDne bhi jaana hai

ek aawargi ka qissa hai

dasht ko raat bhar sunana hai

dekhna dur-dur se us ko

khel achchha hai par purana hai

ek hazin KHwab do hasin aankhen

aur kya zindagi se pana hai

ab jo dil ki KHala mein utre hain

ek diwar ko uThana hai

zindagi ek chhoTi si rudad

milte jaana bichhaDte jaana hai

dur se dekhna hai hasrat ko

fasla darmiyan bichhana hai

waqt ka sab kiya dhara 'mira'

ye KHizaen to ek bahana hai