uske liye aankhen dar-e-be-KHwab mein rakh dun

us ke liye āñkheñ dar-e-be-ḳhvāb meñ rakh duuñ

phir shab ko jalā kar unheñ mehrāb meñ rakh duuñ

sūrat hai yahī ab to guzarnā hai yūñhī vaqt

jis baat ko dil chāhe use ḳhvāb meñ rakh duuñ

phirte haiñ sadā jis meñ samundar bhī zamīñ bhī

ye puurā falak bhī usī girdāb meñ rakh duuñ

ye saare sitāre kisī dariyā meñ bahā duuñ

bas chāñd pakaḌ kar kisī tālāb meñ rakh duuñ

kapḌe jo mujhe tang hoñ pahnā duuñ ḳhalā ko

aur ḳhvāb purāne kahīñ mahtāb meñ rakh duuñ

itnā bhī na āsāñ ho yahāñ pyaas bujhānā

bahtā huā dhoka sā kahīñ aab meñ rakh duuñ

sab kuchh hī gañvā dene se behtar hai ki 'shāhīñ'

ḳhāshāk-e-dil-o-jāñ rah-e-sailāb meñ rakh duuñ

us ke liye aankhen dar-e-be-KHwab mein rakh dun

phir shab ko jala kar unhen mehrab mein rakh dun

surat hai yahi ab to guzarna hai yunhi waqt

jis baat ko dil chahe use KHwab mein rakh dun

phirte hain sada jis mein samundar bhi zamin bhi

ye pura falak bhi usi girdab mein rakh dun

ye sare sitare kisi dariya mein baha dun

bas chand pakaD kar kisi talab mein rakh dun

kapDe jo mujhe tang hon pahna dun KHala ko

aur KHwab purane kahin mahtab mein rakh dun

itna bhi na aasan ho yahan pyas bujhana

bahta hua dhoka sa kahin aab mein rakh dun

sab kuchh hi ganwa dene se behtar hai ki 'shahin'

KHashak-e-dil-o-jaan rah-e-sailab mein rakh dun