uski aankhon mein haya aur ishaara bhi hai
us kī āñkhoñ meñ hayā aur ishāra bhī hai
band hoñToñ se mujhe is ne pukārā bhī hai
us ne kāñdhe pe hamāre jo kabhī sar rakkhā
yuuñ lagā ziist meñ koī to hamārā bhī hai
riit bhī garm hai aur dhuup bhī hai tez magar
us kī pur-kaif rifāqat kā sahārā bhī hai
chuum kar haath mirā detā hai vo dil ko kasak
kaisā dushman hai ki jo jaan se pyārā bhī hai
us ke ruḳhsār pe bārish kī vo halkī būñdeñ
phuul par qatra-e-shabnam kā nazārā bhī hai
itnā itrānā bhī kuchh Thiik nahīñ yaad rahe
ziist meñ naf.a bhī hai aur ḳhasārā bhī hai
tairtā jaatā huuñ aur soch rahā huuñ 'anjum'
is samundar kā kahīñ koī kinārā bhī hai
us ki aankhon mein haya aur ishaara bhi hai
band honTon se mujhe is ne pukara bhi hai
us ne kandhe pe hamare jo kabhi sar rakkha
yun laga zist mein koi to hamara bhi hai
rit bhi garm hai aur dhup bhi hai tez magar
us ki pur-kaif rifaqat ka sahaara bhi hai
chum kar hath mera deta hai wo dil ko kasak
kaisa dushman hai ki jo jaan se pyara bhi hai
us ke ruKHsar pe barish ki wo halki bunden
phul par qatra-e-shabnam ka nazara bhi hai
itna itrana bhi kuchh Thik nahin yaad rahe
zist mein nafa bhi hai aur KHasara bhi hai
tairta jata hun aur soch raha hun 'anjum'
is samundar ka kahin koi kinara bhi hai
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
