uski aankhon ne sar-e-bazm Thaharne na diya

us kī āñkhoñ ne sar-e-bazm Thaharne na diyā

sabr mazlūm ko zālim kī nazar ne na diyā

aañkh bhar kar unheñ ham dekh hī lete dam bhar

itnā mauqa.a hī kabhī dīda-e-tar ne na diyā

shikva-e-va.ada-ḳhilāfī pe vo jhallā.e magar

muskurāhaT ke tasadduq ki mukarne na diyā

jab vo aa.e sar-e-mahfil to sañvarne aa.e

un ko shoḳhī ne kabhī ghar meñ sañvarne na diyā

apnī barbād javānī kī hai rūdād itnī

ġham ne hañsne na diyā ishq ne marne na diyā

'mast' kyā us kī mohabbat meñ tirā dil Thahrā

apnī nazroñ ko kabhī jis ne Thaharne na diyā

us ki aankhon ne sar-e-bazm Thaharne na diya

sabr mazlum ko zalim ki nazar ne na diya

aankh bhar kar unhen hum dekh hi lete dam bhar

itna mauqa hi kabhi dida-e-tar ne na diya

shikwa-e-wada-KHilafi pe wo jhallae magar

muskurahaT ke tasadduq ki mukarne na diya

jab wo aae sar-e-mahfil to sanwarne aae

un ko shoKHi ne kabhi ghar mein sanwarne na diya

apni barbaad jawani ki hai rudad itni

gham ne hansne na diya ishq ne marne na diya

'mast' kya us ki mohabbat mein tera dil Thahra

apni nazron ko kabhi jis ne Thaharne na diya