uski banhon mein simaTne ka jo chaara mil gaya

us kī bāñhoñ meñ simaTne kā jo chāra mil gayā

yuuñ lagā jiine kā ham ko lutf saarā mil gayā

hausla jaagā to maujoñ meñ kinārā mil gayā

Dūbne vāloñ ko tinke kā sahārā mil gayā

rakh deñ qadmoñ meñ tire duniyā kī sab rangīniyāñ

surma.ī āñkhoñ kā terī jab ishāra mil gayā

kar rakhe haiñ apne jalvoñ se munavvar bastiyāñ

husn kā jis jis ko bhī tere utārā mil gayā

kis liye tark-e-marāsim par ho āmāda kaho

kyā koī ham se ziyāda tum ko pyārā mil gayā

dāstāñ apnī sunā kar ham ne samjhāyā use

jab kahīñ ham ko koī bhī ġham kā maarā mil gayā

mil gayā hai saath us kā zindagī bhar ke liye

yā'nī ai 'sāhil' hameñ hissa hamārā mil gayā

us ki banhon mein simaTne ka jo chaara mil gaya

yun laga jine ka hum ko lutf sara mil gaya

hausla jaga to maujon mein kinara mil gaya

Dubne walon ko tinke ka sahaara mil gaya

rakh den qadmon mein tere duniya ki sab ranginiyan

surmai aankhon ka teri jab ishaara mil gaya

kar rakhe hain apne jalwon se munawwar bastiyan

husn ka jis jis ko bhi tere utara mil gaya

kis liye tark-e-marasim par ho aamada kaho

kya koi hum se ziyaada tum ko pyara mil gaya

dastan apni suna kar hum ne samjhaya use

jab kahin hum ko koi bhi gham ka mara mil gaya

mil gaya hai sath us ka zindagi bhar ke liye

ya'ni ai 'sahil' hamein hissa hamara mil gaya