uski nazar ka mujh pe kuchh aisa asar hua

us kī nazar kā mujh pe kuchh aisā asar huā

dil thā sadaf misāl ba-rañg-e-guhar huā

vo shoḳhiyāñ thiiñ aur na vo rañg-rūp thā

kal maiñ bahut udaas use dekh kar huā

īsār aur vafā kī mire dāstāñ ye hai

jab bhī vatan pe vaar hue maiñ sipar huā

vo hādisa to koī baḌā hādisa na thā

ye aur baat dil pe ziyāda asar huā

aisā bhī ek dar hai isī kā.enāt meñ

us dar kā jo faqīr huā tājvar huā

ab jā ke mujh ko sard shabistāñ huā nasīb

barsoñ tamām jism pasīne meñ tar huā

dahshat-zada fazāoñ se vo be-niyāz thā

jab us kā ghar jalā hai to us par asar huā

yaad aa ga.ī thī mujh ko shahīd-e-vafā kī pyaas

dariyā ko dekh kar jo mirā dil sharar huā

patthar bhī pheñkte koī aatā nahīñ idhar

būḌhe shajar kī tarah jo maiñ be-samar huā

jis din mirī ġhazal ne chhue us ke lab 'bashīr'

us din mirī ġhazal kā safar mo'atabar huā

us ki nazar ka mujh pe kuchh aisa asar hua

dil tha sadaf misal ba-rang-e-guhar hua

wo shoKHiyan thin aur na wo rang-rup tha

kal main bahut udas use dekh kar hua

isar aur wafa ki mere dastan ye hai

jab bhi watan pe war hue main sipar hua

wo hadisa to koi baDa hadisa na tha

ye aur baat dil pe ziyaada asar hua

aisa bhi ek dar hai isi kaenat mein

us dar ka jo faqir hua tajwar hua

ab ja ke mujh ko sard shabistan hua nasib

barson tamam jism pasine mein tar hua

dahshat-zada fazaon se wo be-niyaz tha

jab us ka ghar jala hai to us par asar hua

yaad aa gai thi mujh ko shahid-e-wafa ki pyas

dariya ko dekh kar jo mera dil sharar hua

patthar bhi phenkte koi aata nahin idhar

buDhe shajar ki tarah jo main be-samar hua

jis din meri ghazal ne chhue us ke lab 'bashir'

us din meri ghazal ka safar mo'atabar hua