usko gar apna kaho fard qarabat jaano

us ko gar apnā kaho fard qarābat jaano

vo agar jhuuT bhī bole to sadāqat jaano

zindagī bhar to koī saath nibhāne se rahā

ek do pal kī mulāqāt ġhanīmat jaano

tum jo nikle ho mohabbat kī tijārat ke liye

is meñ nuqsān uThāoge haqīqat jaano

saañs lene kī ijāzat hai tumheñ shukr karo

aise māhaul meñ zinda ho ġhanīmat jaano

vaqt guzrā to kabhī lauT ke aa.egā nahīñ

vaqt kī qadr karo vaqt kī qīmat jaano

is zamāne meñ koī hañs ke agar baat kare

mo'jiza samjho ise koī karāmat jaano

us kī achhā.iyāñ āḳhir ko khulīñ nā tum par

ham na kahte the use 'nūr' burā mat jaano

us ko gar apna kaho fard qarabat jaano

wo agar jhuT bhi bole to sadaqat jaano

zindagi bhar to koi sath nibhane se raha

ek do pal ki mulaqat ghanimat jaano

tum jo nikle ho mohabbat ki tijarat ke liye

is mein nuqsan uThaoge haqiqat jaano

sans lene ki ijazat hai tumhein shukr karo

aise mahaul mein zinda ho ghanimat jaano

waqt guzra to kabhi lauT ke aaega nahin

waqt ki qadr karo waqt ki qimat jaano

is zamane mein koi hans ke agar baat kare

mo'jiza samjho ise koi karamat jaano

us ki achhaiyan aaKHir ko khulin na tum par

hum na kahte the use 'nur' bura mat jaano