usko pana hi kuchh aisa hai ki paya to nahin

us ko paanā hī kuchh aisā hai ki paayā to nahīñ

yā hameñ kho.e hue haiñ kahīñ aisā to nahīñ

haal bīmār-e-mohabbat kā kuchh achchhā to nahīñ

tum sañbhalnā jise samjhe ho sañbhālā to nahīñ

apne girne kā to afsos nahīñ hai mujh ko

dekhnā ye hai kisī ne mujhe dekhā to nahīñ

ye ḳhatā koī ḳhatā hai zarā socho to sahī

ik nazar dekhā hai bas aap ko chāhā to nahīñ

aap kā vā'da-e-fardā bhī bajā hai lekin

chārasāzī kā ye dā'vā hai mudāvā to nahīñ

aap ke 'ishq meñ ham jaañ se guzar jā.eñge

qaul mardoñ kā hai ye aap kā vā'da to nahīñ

ek dil de ke tire dard kī daulat paa.ī

ham ne ulfat meñ kamāyā hai gañvāyā to nahīñ

kis liye tez huī jaatī hai dil kī dhaḌkan

aap ne dekhā hai mujh ko kahīñ aisā to nahīñ

haq ke dīdār kī muusā se haqīqat pūchho

us ne dekhā bhī to yuuñ dekhā ki dekhā to nahīñ

aap hī kahiye ki haiñ aap mire rū-ba-nazar

yā faqat merī nigāhoñ kā ye dhokā to nahīñ

'ishq aur mushk chhupā.e kahīñ chhupte haiñ 'amar'

laakh parda karo duniyā se ye pardā to nahīñ

us ko pana hi kuchh aisa hai ki paya to nahin

ya hamein khoe hue hain kahin aisa to nahin

haal bimar-e-mohabbat ka kuchh achchha to nahin

tum sanbhalna jise samjhe ho sanbhaala to nahin

apne girne ka to afsos nahin hai mujh ko

dekhna ye hai kisi ne mujhe dekha to nahin

ye KHata koi KHata hai zara socho to sahi

ek nazar dekha hai bas aap ko chaha to nahin

aap ka wa'da-e-farda bhi baja hai lekin

chaarasazi ka ye da'wa hai mudawa to nahin

aap ke 'ishq mein hum jaan se guzar jaenge

qaul mardon ka hai ye aap ka wa'da to nahin

ek dil de ke tere dard ki daulat pai

hum ne ulfat mein kamaya hai ganwaya to nahin

kis liye tez hui jati hai dil ki dhaDkan

aap ne dekha hai mujh ko kahin aisa to nahin

haq ke didar ki musa se haqiqat puchho

us ne dekha bhi to yun dekha ki dekha to nahin

aap hi kahiye ki hain aap mere ru-ba-nazar

ya faqat meri nigahon ka ye dhoka to nahin

'ishq aur mushk chhupae kahin chhupte hain 'amar'

lakh parda karo duniya se ye parda to nahin