usko sitamgari mein kisi dil se kya gharaz

us ko sitamgarī meñ kisī dil se kyā ġharaz

qātil ko be-qarārī-e-bismil se kyā ġharaz

jis meñ na terī yaad ho us dil se kyā ġharaz

lailā na ho to qais ko mahmil se kyā ġharaz

mashq-e-sitamgarī na kare vo muhāl hai

us ko hamāre is dil-e-bismil se kyā ġharaz

majnūñ ke dekhne kā nahīñ ishtiyāq kuchh

lailā ko chāk-e-parda-e-mahmil se kyā ġharaz

tishna huuñ bahr-e-ulfat-e-abrū-e-yār kā

dariyā-e-āb-e-ḳhanjar-e-qātil se kyā ġharaz

kāTūñgā āftāb kī sūrat se tā-ba-shām

mujh garm-rau ko dūrī-e-manzil se kyā ġharaz

parvāna sham.a ke liye aatā hai bazm meñ

dil ko hamāre mardum-e-mahfil se kyā ġharaz

kahtā hai āsmān se dāġh-e-jigar mirā

ḳhud mehr huuñ mujhe mah-e-kāmil se kyā ġharaz

saudā kisī kī zulf-e-musalsal kā hai mujhe

haddād mujh ko tauq-o-salāsil se kyā ġharaz

aaya hai daam le ke asīrī ke vāste

sayyād ko hai shor-e-anādil se kyā ġharaz

fart-e-bukā se aañkh meñ aañsū thameñge kyā

dariyā-e-be-kanār ko sāhil se kyā ġharaz

josh-e-junūñ meñ ḳhud ko jo lailā qarār de

phir qais ko ho sāhib-e-mahmil se kyā ġharaz

detā huuñ maiñ use to vo kahte haiñ ta۔an se

auroñ kā ho gayā mujhe is dil se kyā ġharaz

dariyā-e-faiz-o-jūd-o-saḳhā jis kā band ho

phir us danī ko kashtī-e-sā.il se kyā ġharaz

shākī na huuñ ḳhudā se maiñ jab apne ḳhuun kā

mahshar meñ phir ho dāman-e-qātil se kyā ġharaz

dil jab butān-e-dahr ke ḳhālī hoñ dard se

sangīñ diloñ ko phir ho mire dil se kyā ġharaz

tīr-e-nazar se koī nishāna ho un ko kyā

ho be-qarār tā.ir-e-bismil se kyā ġharaz

jab aap hī na ho to ilāqa kisī se kyā

sar kaT gayā to ḳhanjar-e-qātil se kyā ġharaz

aa.eñ haiñ dekhne ko tamāshā vo raqs kā

mar jaa.e yā jiye unheñ bismil se kyā ġharaz

milte nahīñ agar to mire dil ko pher do

mujh se ġharaz nahīñ to mire dil se kyā ġharaz

'fāḳhir' karūñ savāl maiñ kyā sūrat-e-faqīr

dar tak na aa.e jo use saa.il se kyā ġharaz

us ko sitamgari mein kisi dil se kya gharaz

qatil ko be-qarari-e-bismil se kya gharaz

jis mein na teri yaad ho us dil se kya gharaz

laila na ho to qais ko mahmil se kya gharaz

mashq-e-sitamgari na kare wo muhaal hai

us ko hamare is dil-e-bismil se kya gharaz

majnun ke dekhne ka nahin ishtiyaq kuchh

laila ko chaak-e-parda-e-mahmil se kya gharaz

tishna hun bahr-e-ulfat-e-abru-e-yar ka

dariya-e-ab-e-KHanjar-e-qatil se kya gharaz

kaTunga aaftab ki surat se ta-ba-sham

mujh garm-rau ko duri-e-manzil se kya gharaz

parwana shama ke liye aata hai bazm mein

dil ko hamare mardum-e-mahfil se kya gharaz

kahta hai aasman se dagh-e-jigar mera

KHud mehr hun mujhe mah-e-kaamil se kya gharaz

sauda kisi ki zulf-e-musalsal ka hai mujhe

haddad mujh ko tauq-o-salasil se kya gharaz

aaya hai dam le ke asiri ke waste

sayyaad ko hai shor-e-anadil se kya gharaz

fart-e-buka se aankh mein aansu thamenge kya

dariya-e-be-kanar ko sahil se kya gharaz

josh-e-junun mein KHud ko jo laila qarar de

phir qais ko ho sahib-e-mahmil se kya gharaz

deta hun main use to wo kahte hain ta۔an se

auron ka ho gaya mujhe is dil se kya gharaz

dariya-e-faiz-o-jud-o-saKHa jis ka band ho

phir us dani ko kashti-e-sail se kya gharaz

shaki na hun KHuda se main jab apne KHun ka

mahshar mein phir ho daman-e-qatil se kya gharaz

dil jab butan-e-dahr ke KHali hon dard se

sangin dilon ko phir ho mere dil se kya gharaz

tir-e-nazar se koi nishana ho un ko kya

ho be-qarar tair-e-bismil se kya gharaz

jab aap hi na ho to ilaqa kisi se kya

sar kaT gaya to KHanjar-e-qatil se kya gharaz

aaen hain dekhne ko tamasha wo raqs ka

mar jae ya jiye unhen bismil se kya gharaz

milte nahin agar to mere dil ko pher do

mujh se gharaz nahin to mere dil se kya gharaz

'faKHir' karun sawal main kya surat-e-faqir

dar tak na aae jo use sail se kya gharaz