us maqtal-e-hasti se guzar jaenge hum bhi

us maqtal-e-hastī se guzar jā.eñge ham bhī

duniyā yahī duniyā hai to mar jā.eñge ham bhī

ham se bhī ulajhte haiñ ba-har-gām ye saa.e

shāyad ye samajhte haiñ ki Dar jā.eñge ham bhī

jaise bhī haiñ insān haiñ ai bād-e-muḳhālif

tinke to nahīñ haiñ ki bikhar jā.eñge ham bhī

ye tundī-o-tezī hai to lahroñ ke sahāre

kashtī na sahī paar utar jā.eñge ham bhī

taufīq-e-ġham-e-ishq bhī sab ko nahīñ miltī

ḳhush haiñ ki ye ik kaam to kar jā.eñge ham bhī

vo ḳhūn-e-tamannā sahī har naqsh-e-vafā meñ

ik rang-e-dil-āvez to bhar jā.eñge ham bhī

ye ishq kī fitrat meñ vadī.at hai azal se

ik naqsh-e-hasīñ ban ke ubhar jā.eñge ham bhī

sar-garm-e-safar vo bhī hai aur ham bhī musalsal

Thahrā jo zamāna to Thahar jā.eñge ham bhī

har taaza taġhayyur se ye kah do ki bil-āḳhir

har marhala-e-nau se guzar jā.eñge ham bhī

ye jazb-e-mohabbat hai to phir sher hai kyā shai

nashtar kī tarah dil meñ utar jā.eñge ham bhī

dekhā hai kuchh is tarah tirā husn-e-jahāñ-tāb

sochā hai ki tā-hadd-e-nazar jā.eñge ham bhī

ik aur bhī duniyā hai jo is se bhī hasīñ hai

kho jā.eñge jalvoñ meñ agar jā.eñge ham bhī

guzre the kabhī sarmad-o-mansūr jidhar se

us raah se be-ḳhauf-o-ḳhatar jā.eñge ham bhī

sauġhāt-e-mohabbat haiñ ye kuchh zaḳhm kuchh aañsū

le kar yahī kuchh la.al-o-gohar jā.eñge ham bhī

har-chand ki hai duur bhī dushvār bhī manzil

āsār ye kahte haiñ magar jā.eñge ham bhī

ye zauq-e-safar shauq-e-safar hai to yaqīnan

'rāhī' na sahī zād-e-safar jā.eñge ham bhī

us maqtal-e-hasti se guzar jaenge hum bhi

duniya yahi duniya hai to mar jaenge hum bhi

hum se bhi ulajhte hain ba-har-gam ye sae

shayad ye samajhte hain ki Dar jaenge hum bhi

jaise bhi hain insan hain ai baad-e-muKHalif

tinke to nahin hain ki bikhar jaenge hum bhi

ye tundi-o-tezi hai to lahron ke sahaare

kashti na sahi par utar jaenge hum bhi

taufiq-e-gham-e-ishq bhi sab ko nahin milti

KHush hain ki ye ek kaam to kar jaenge hum bhi

wo KHun-e-tamanna sahi har naqsh-e-wafa mein

ek rang-e-dil-awez to bhar jaenge hum bhi

ye ishq ki fitrat mein wadiat hai azal se

ek naqsh-e-hasin ban ke ubhar jaenge hum bhi

sar-garm-e-safar wo bhi hai aur hum bhi musalsal

Thahra jo zamana to Thahar jaenge hum bhi

har taza taghayyur se ye kah do ki bil-aKHir

har marhala-e-nau se guzar jaenge hum bhi

ye jazb-e-mohabbat hai to phir sher hai kya shai

nashtar ki tarah dil mein utar jaenge hum bhi

dekha hai kuchh is tarah tera husn-e-jahan-tab

socha hai ki ta-hadd-e-nazar jaenge hum bhi

ek aur bhi duniya hai jo is se bhi hasin hai

kho jaenge jalwon mein agar jaenge hum bhi

guzre the kabhi sarmad-o-mansur jidhar se

us rah se be-KHauf-o-KHatar jaenge hum bhi

saughat-e-mohabbat hain ye kuchh zaKHm kuchh aansu

le kar yahi kuchh lal-o-gohar jaenge hum bhi

har-chand ki hai dur bhi dushwar bhi manzil

aasar ye kahte hain magar jaenge hum bhi

ye zauq-e-safar shauq-e-safar hai to yaqinan

'rahi' na sahi zad-e-safar jaenge hum bhi